अन्तर्राष्ट्रिय उडानलाई सहज बनाउन उडान सेवा प्रदायकहरूसँग सहकार्य गरिने तथा आन्तरिक हवाई सेवालाई सुरक्षित, भरपर्दो र आरामदायी बनाइने योजना प्रस्तुत गरिएको छ। साथै भिसा प्रक्रिया र आन्तरिक उडान भाडादर पुनरावलोकन गरी नेपाललाई थप आकर्षक गन्तव्य बनाइने बताइएको छ। 

लक्जरी रिसोर्ट, इको–लज र वेलनेस सेन्टर निर्माण तथा सञ्चालनमा निजी क्षेत्रलाई प्रोत्साहन गरिनेछ। सामाजिक सञ्जाल, अन्तर्राष्ट्रिय ट्राभल ब्लगर, इन्फ्लुएन्सर, वृत्तचित्र तथा चलचित्रमार्फत नेपालका विविध पर्यटन क्षेत्र र अनुभवहरूको आक्रामक प्रचार गरिने योजना छ। यस अभियानमा नेपाली डायस्पोराको सक्रिय सहभागिता सुनिश्चित गरिने पार्टीले जनाएको छ ।

गाउँ–सहरमा रोजगारी र आम्दानी

घोषणापत्रले पर्यटन विस्तारलाई गाउँ र सहर दुवै क्षेत्रमा रोजगारी र आम्दानी सिर्जना गर्ने माध्यमका रूपमा अघि सारेको छ। 'लामो बसाइ, बढी खर्च'  रणनीतिमार्फत स्थानीय अर्थतन्त्र सुदृढ बनाउने लक्ष्य पार्टीले राखेको छ। एमालेले पर्यटनलाई समग्र आर्थिक रूपान्तरणको प्रमुख आधारका रूपमा विकास गर्ने स्पष्ट संकेत दिएको छ।