जनकपुर — दुई सिटमा कुरा नमिलेको भन्दै जसपा नेपालले मधेश प्रदेशमा राष्ट्रिय सभाका लागि छुट्टै उम्मेदवारी दिएको छ ।कांग्रेस–एमालेको समर्थनमा जसपाका नेता महन्थ ठाकुरले सुरुमा उम्मेदवारी दर्ता गराएपछि जसपाका तीन जना उम्मेदवारले पछि एकैसाथ उम्मेदवारी दिएका छन् ।

जसपा नेपालका नेता शैलेन्द्र साहले कांग्रेस र एमालेसित राष्ट्रिय सभाका दुई सिटमा सहमति नभएकाले छुट्टै उम्मेदवारी दिएको बताए । 

जसपा नेपालले राष्ट्रिय सभाका लागि अल्पसंख्यकतर्फ शैलेश चौधरी, महिलातर्फ चन्द्रकला साह र दलिततर्फ चमेलीदेवी दासलाई उम्मेदवार बनाएको छ ।

‘दुई सिटमा कुरा नमिलेपछि हामीले छुट्टै उम्मेदवारी दिएका हौं,’ जसपाका नेता साहले भने,‘अध्यक्षजी भैरहवामा हुनुहुन्छ । काठमाडौं फर्किएपछि कांग्रेस–एमालेसँग थप कुराकानी हुनेछ । २७ गतेसम्म उम्मेदवारी फिर्ताको समय त छँदैछ ।’

यता, उम्मेदवारी दर्ता गराएपछि सञ्चारकर्मीको ‘कुन दलको गठबन्धनबाट तपाईंको उम्मेदवारी परेको हो ?’  भन्ने प्रश्नमा जसपाका नेता महन्थ ठाकुर मौन बसे । उनकै पछाडि उभिएका नेता शरदसिंह भण्डारीले कांग्रेस–एमालेको तालमेलमा उम्मेदवारी दिएको बताएका थिए ।