काठमाडौँ — २०७९ को प्रतिनिधिसभा चुनावमा उम्मेदवारको मनोनयन दर्ताको अन्तिम दिनसम्म पनि तत्कालीन माओवादी अध्यक्ष पुष्पकमल दाहालले चितवन–३ बाटै चुनाव उठ्ने बताएका थिए ।

 त्यही कुराको विश्वास दिलाउन उनले भरतपुर महानगर–१४, शिवनगरमा घर नै बनाएर सरे । पञ्चेबाजाको लश्कर नै लगाएर घर सरेपछि दाहालले चितवनसँगको आफ्नो साइनो झनै कसिलो भएको बताएका थिए । यस्तो भने पनि अन्ततः उनले चितवन–३ सुरक्षित देखेनन् र गोरखा–२ पुगे ।

त्यतिबेला चितवनबाट गोरखा सरेपछि भने दाहालले नयाँ–नयाँ स्थानबाट चुनाव लड्ने आफ्नो विगत भएको बताउँदै भनेका थिए, ‘मैले पहिला रोल्पा, काठमाडौं, मधेशमा सिरहा र चितवनबाट निर्वाचन लडेको छु । यसरी देशको पूर्व–पश्चिम, मधेश–पहाड घुम्दै चुनाव लड्ने सायद नेपालको इतिहासमा म नै पहिलो भएको छु कि जस्तो लागेको छ ।’ के दाहालले आसन्न प्रतिनिधिसभा निर्वाचनमा पनि यस्तै मनोदशा खेप्दै छन् ?

त्यसो त दाहालले २०६४ को पहिलो संविधानसभा निर्वाचनमा प्रचण्ड काठमाडौं–१० र रोल्पा–२ बाट निर्वाचन लडेका थिए । विद्रोहबाट संसदीय राजनीतिमा आइपुगेका दाहालले उक्त निर्वाचनमा दुवै स्थानबाट जीत हासिल गरे । २०७० मा दोस्रो पटक भएको संविधानसभा निर्वाचनमा दाहाल काठमाडौं–१० मा र सिराहा–५ बाट चुनाव लडे । काठमाडौंबाट पराजित दाहालले सिराहाबाट पनि निकै कठिनसँग जिते । २०७४ मा भने उनी गृहचजिल्ला चितवन-३ बाट विजयी भएका थिए । 

२०७४ को स्थानीय तह निर्वाचनमा कांग्रेससँग गठबन्धन गरेर भरतपुर महानगरमा छोरी रेणु दाहाललाई मेयर बनाएपछि धेरैले आँकलन गरेका थिए, आउने निर्वाचनमा दाहाल चितवनबाटै चुनाव उठ्लान् । तर त्यस्ता आँकलनलाई गलत साबित गर्दै दाहाल पुगे, गोरखा–२ ।