नगरपालिकाले उपभोक्ता समितिमार्फत ९८ लाख बजेट विनियाेज गरी पोखरी पुनर्निर्माणको काम सुरु गरेको हो । भूकम्पपछि पोखरी वरपर रहेको चारैतिरका पेटी भासिएका थिए । उपभोक्ता समितिले खुला रूपमा श्रमदानकाे आह्वान गरेपछि हालसम्म ७५० जनाले श्रमदान गरिसकेका छन् । श्रमदान गर्नेमा स्थानीय, विभिन्न पेसागत संगठन र विद्यार्थीहरू समेत रहेका छन् ।

सिद्धपोखरीमा हुने इन्द्रजात्रालाई लक्षित गरेर पुनर्निर्माण सम्पन्न गर्ने लक्ष्य राखिएको भक्तपुर-१ का वडाध्यक्ष श्यामकृष्ण खत्रीले जानकारी दिए । हाल सिद्धपोखरीमा रहेका पेटी पुनर्निर्माण र सिद्धपोखरीभित्र रहेको हिलो निकाल्ने काम भइरहेको छ । अब दक्षिण भेगमा रहेको भाजुपोखरीमा रहेको पानी सिद्धपोखरीमा सार्ने तयारी छ । भाजुपोखरीमा भने डिप बोरिङबाट पानी राख्ने तयारी भइरहेको वडाध्यक्ष खत्रीले बताए ।