एक महिनाकी सुत्केरी जिज्ञासा टुडुसहित १० जनाको हेमरम परिवार अहिले खुला आकाशमुनि रात बिताइरहेको छ । ‘बिहान पानीको भेल आयो, घरको केही सामान झिक्न नपाउँदै डुबाइहाल्यो,' हेमरमले भने,'जसोतसो ज्यान बचाएर भागियो ।' बर्षा रोकिएपछि खोलामा पानीको सतह घटेको छ । कतिपय गाउँले घर फर्किन थालेका छन् । तर हेमरमजस्ता धेरै परिवार अझै सडक, विद्यालय र सामुदायिक भवनमा आश्रित छन् ।

बाढीले सबै लुगाफाटा, अन्नपात र सामान भिजाएको स्थानीय कादो राजवंशीले सुनाए । ‘घर पूरै डुबेको छ, भित्रै हिलो भरिएको छ,’ उनले भने, ‘सफा गर्नै मुस्किल छ । तत्काल बस्न सक्ने स्थिति छैन ।’

प्रेम र शंकर राजवंशीको ११ जनाको परिवारको बास पनि सडकमै छ । ती सबै अहिले अस्थायी टहरामा रात काटिरहेका छन्  ।पीडितहरूलाई रेडक्रस र स्थानीय पालिकाले बास र खानाको प्रबन्ध मिलाएको रेडक्रस झापाका सभापति लोकराज ढकालले जनाए। अगनवती, चानवती, चन्द्रे राजवंशी, धुला, सुनिता मर्डी र निसावु माझीका घर पनि बाढीले बगाएको छ ।

जिल्ला प्रहरी कार्यालय झापाका अनुसार झापा गाउँपालिकामा मात्रै करिब १५ हजार घरधुरीका २५ हजारभन्दा बढी स्थानीय बाढीबाट प्रभावित भएका छन् । सडकबारीका बाढीपीडितहरूका अनुहारमा अहिले निराशा र चिन्ता मिसिएको छ । बाढीको पानी घटे पनि उनीहरूको पीडा घटेको छैन ।