‘सामान कहिले आउँछ ? छिट्टो गर्नुस् भनेर फोन आएका छन्,’ विकले भने,‘भत्किएको डाइभर्सन बनाउने सुर नै देख्दिनँ । लोड गाडी वैकल्पिक बाटो जान पनि स्थानीयले अवरोध गर्छन् । कहिले गन्तव्य पुग्ने हो टुंगो छैन ।’

उनी जस्तै तनावमा थिए भारतका मोहम्मद मुजिम आलम । ‘यदि बाटो सहज हुन्थ्यो भने म अहिले घर पुगिसकेको हुन्थेँ,’ पाँच दिनदेखि यही राजमार्गमा रोकिएका आलमले भने, ‘सबैले गाडी चलेको छ भनेर आएँ । आएपछि थाहा भयो यहाँ बन्द रहेछ ।’ उनी काठमाडौंमा सामान पुर्‍याएर भारत फर्कँदै थिए ।

‘ल्याएको खाना पकाएर खाइसक्यौं । अहिले बिस्कुट खाँदैछु,’ आलमले भने,‘यहाँ प्रशासनको कोही मान्छे पनि हाम्रो कुरा सुन्न आएको छैन । २० भन्दा बढी हाम्रो भारतका साथीहरुको गाडी यहीँ छ ।’ आलम भारत फर्कन पाए फेरि नेपाल सामान लिएर नआउनेसमेत बताउँछन् । ‘नेपालको सिम नहुँदा घरमासमेत कुरा गर्न पाएको छैन । कहिले खुल्ने हो त्यो त जानकारी दिए हुन्थ्यो नि ?,’ आक्रोश पोख्दै आलमले भने,‘यस्तो बिजोग यात्रा कहिल्यै भएको थिएन । नेपालमा यो नै मेरो अन्तिम टिप हो । अब कहिल्यै आउन्नँ ।’

पूर्व–पश्चिम राजमार्गको नारायणगढ–बुटवल सडक खण्डअन्तर्गत दुम्किबासमा रहेको विनयी खोलाको डाइभर्सन बिहीबार राति बगेपछि सवारी आवागमन ठप्प भएका थिए । मालवहाक र ठूला सवारी साधन खोला वारिपारि अड्किएका छन् भने साना सवारी साधनले वैकल्पिक मार्ग प्रयोग गरिरहेका छन् ।

भारतीय लरीको ठक्करबाट गत २८ पुसमा विनयी खोलाको पुल भासिएको थियो । त्यसपछि निर्माण गरिएको डाइभर्सन सामान्य वर्षामा पनि पटकपटक बग्ने गरेको थियो । बिहीबार राति भे १ ख ४०८५ नम्बरको बस डाइभर्सन पार गर्न खोज्दा भेलमा फसेको गाडी एक्स्काभेटरसहित आएका सुरक्षाकर्मी र स्थानीयले यात्रुको उद्धार गरेपछि मानवीय क्षति भने हुन पाएको थिएन । भत्किएको पुल नजिकै नयाँ पुल निर्माण भएपनि पुल सञ्चालन गर्न प्राविधिक कारणले २२ गते अघि सञ्चालनमा नआउने निर्माण कम्पनीले बताएको छ । अहिले यो सडकमा कोही पैदलै यात्रा गर्दै छन् भने अधिकांश यात्रुवहाक सवारी साधन वैकल्पिक बाटो भएर गन्तव्य पछ्याएका छन् । लोड गाडीहरु वैकल्पिक सडक पनि प्रयोग गर्न समस्या भएपछि लामो समयदेखि सडकमा नै रात बिताउन बाध्य छन् ।

‘शुद्ध पिउने पानी र शौचालयको समस्या छ । यही कारणले रोग लाग्ने हो कि ? डर सुरु भएको छ,’ चालक विकले थपे, ‘गम्भीर विषयमा पनि सरकारले ध्यान दिएको छैन । यहाँबाट पारी पुगेपनि दाउनेमा झन् समस्या छ भन्छन् ।’

सडक स्तरोन्नतिमा सरकार र ठेकेदारको लापरबाहीले गर्दा राष्ट्रिय गौरवको आयोजनाका रूपमा रहेको नारायणगढ–बुटवल सडक खण्ड बर्खामा हिलाम्य र हिउँदमा धुलाम्य हुन्छ ।

२४ माघ ०७५ मा सडक विभाग र चिनियाँ कम्पनी चाइना स्टेट कन्स्ट्रक्सन इन्जिनियरिङ कर्पोरेसन लिमिटेड, बेइजिङबीच भएको सम्झौता अनुसार ११३ किलोमिटर सडक यो सडक तीन वर्षअघि साउनमै निर्माण भइसक्नुपर्ने हो । तीनपटक म्याद थप गरेर ८ साउन ०८२ सम्म पुर्‍याइएको छ । तर, सडक विस्तारको काम थपिएको समयमा सम्पन्न हुने निश्चित छैन । आयोजनाका अनुसार अहिले सडकको ७० प्रतिशत काम सम्पन्न भएको छ ।