यो चाड इस्लामिक पात्रोअनुसार नवौँ महिना रमजानभर गरिएको उपवास (रोजा) को समापनमा मनाइन्छ।

काठमाडौँको जामे मस्जिद, टुँडिखेललगायत विभिन्न स्थानमा मुस्लिम धर्मावलम्बीहरूले नमाज अदा गरी इद उल फित्र मनाइरहेका छन्। देशभरका विभिन्न मस्जिदहरूमा मुस्लिम धर्मावलम्बीहरूको भीड लागेको छ। उनीहरूले एक आपसमा शुभकामना साटासाट गर्दै इद उल फित्र मनाइरहेका छन्।

इद उल फित्रको अवसरमा सरकारले आज सार्वजनिक बिदा समेत दिएको छ। रोजाको अवधिमा मुस्लिम धर्मावलम्बीहरूले सूर्योदयदेखि सूर्यास्तसम्म भोजन, पानी तथा अन्य भौतिक सुख-सुविधाबाट टाढा रहन्छन्। यस अवधिमा आध्यात्मिक शुद्धता, दानशीलता, सहानुभूति तथा आत्मसंयमको अभ्यास गरिन्छ।

इदको दिन इस्लाम धर्मावलम्बीहरूले नेपालगन्जको बीपी चोकस्थित इदगाह मस्जिद भरिभराउ बनाएका छन्। मस्जिदलाई दुलहीझैँ सिङारिएको छ।