काठमाडौं — इटालीमा आयोजित लावारेडो अल्ट्रा ट्रेल १२०केको १९औँ संस्करणकी विजेता नेपाली अल्ट्रा धाविका सुनमाया बुढा स्वदेश फर्किएकी छन् । उनलाई बुधबार त्रिभुवन अन्तराष्ट्रिय विमानस्थलमा स्वागत गरिएको छ । 

उनलाई सोमबार नेपाल एड्भेन्चर रनिङ फेडेरेसनका उपाध्यक्ष राजन खत्री नेतृत्वको शुभेच्छुकहरूले ब्यानर, फूलगुच्छा र खादा लगाएर स्वागत गरेका छन् ।

बुढाले इटालीमा २७ जुनमा आयोजित १२० किलोमिटरको लावारेडो अल्ट्रा ट्रेलको उपाधि जित्दै नयाँ इतिहास रचेकी छन् । उनले १२० किलोमिटरको कठिन दूरी १३ घण्टा ३३ मिनेट १८ सकेन्डमा पार गर्दै नयाँ रेकर्डसमेत कायम गरिन् । उक्त ट्रेलमा ५८०० मिटरभन्दा बढी दुरी उकालो छ । यो समयसँगै उनले ११ वर्षदेखि कायम रहेको कोर्स रेकर्डलाई ६ मिनेटभन्दा बढीले सुधारिन् ।

प्रतिस्पर्धा अन्तिमसम्म निकै रोमाञ्चक बनेको थियो । अन्तिमतिरको ओरालो भागमा उनले अष्ट्रेलियाकी लुसी बार्थोलोम्युलाई उछिन्दै अग्रता लिइन् र अन्ततः करिब १ मिनेट ३० सेकेन्डको अन्तरले विजयी भइन् । यो जित बुढाको सन् २०२६ को पहिलो उपाधि हो ।

गत वर्ष उनले अन्ता हङकङ १०० अल्ट्रा (१०२ किमि), चेङ्दु ट्रेल (६० किमि), माउन्ट युन बाइ युटिएमबी (३० किमि) र अल्ट्रा ट्रेल केप टाउन (९९.४ किमि) गरी ४ अन्तर्राष्ट्रिय प्रतियोगिताको उपाधि जितेकी थिइन् । साथै, विश्व माउन्टेन एन्ड ट्रेल रनिङ च्याम्पियनसिप (८१.२ किमि)मा दोस्रो स्थान हासिल गर्दै उक्त प्रतियोगितामा पदक जित्ने पहिलो एसियाली खेलाडी बनेकी थिइन् । उनले हङकङ अल्ट्रामा पनि नयाँ कोर्स रेकर्ड बनाएकी थिइन् ।