काठमाडौँ — पूर्वाधार विकासमन्त्री सुनील लम्सालको काम नगर्ने ठेकदारको ‘खुट्टा भाँचिदिनुपर्ने’ अभिव्यक्तिलाई लिएर विपक्षी सांसदले जवाफ माग गरेका छन् ।

प्रतिनिधिसभाको आजको बैठकमा एमाले संसदीय दलका प्रमुख सचेतक ऐन महरले मन्त्री लम्सालको अभिव्यक्ति कानुनबमोजिम थियो कि थिएन भन्दै प्रश्न गरे । 'मन्त्रीज्यूले ठेकदारलाई खुट्टा भाँच्ने भन्ने आदेश दिनुभएको थियो । त्यो कानुनबमोजिम थियो कि थिएन ? दाहिने हो कि देब्रे खुट्टा भाँच्नुपर्ने हो ?' महरले भने, 'मन्त्रीको हैसियतमा दिन मिल्ने आदेश हो कि होइन ? अनि ठेकदारलाई मन्त्रालयमा बोलाएर धाकधम्की दिने, गालीगलौज गर्ने, थर्काउने कुरा कानुनबमोजिम थियो कि थिएन ?' 

विनियोजन विधेयकमाथिको छलफलमा मन्त्रालयगत जवाफ दिने क्रममा मन्त्री लम्सालले आफ्नो नियत त्यस्तो नभएको जवाफ दिए । 'इन्टेन्सन त्यो होइन । नितान्त काम गरोस् भन्ने हो । उहाँहरुले काम गर्नु भएन भने त रद्द गर्ने हो । नत्र भने उहाँहरुको सातपुस्तै सकिन्छ । किनभने बैंक ग्यारेन्टी थुत्छ । बाँकी कामको लागि असुलउपर गर्छ,' उनले भने ।