काठमाडौँ — पृष्ठभूमिमा सेताम्मे हिमाल । फेदीमा गलैंचा बिछ्याइजस्तो हरियो मैदान । त्यहीँ क्रिकेटमा रमाइरहेका केही युवा ।

यही सानो भिडियो अंश प्रधानमन्त्री वालेन्द्र शाहले शनिबार दिउँसो फेसबुकमा सेयर गर्दै लेखे- अपि हिमाल बेस क्याम्प, दार्चुला ।

उनले छुस्स केही लेख्नासाथ भ्युज, लाइक अनि सेयरको ओइरो लाग्छ । यसमा पनि त्यस्तै देखियो । सकारात्मक कुरा त धेरैले उनलाई यहाँ अन्तर्राष्ट्रिय क्रकेट रंगशाला बन्नुपर्छ भनेर सुझाव दिएका छन् ।  

यति अग्लो ठाउँमा रंगशाला बन्न सम्भव छ त ? 

अपि हिमालको उचाइ ७ हजार १३२ मिटर हो । प्रधानमन्त्री शाहले भिडियोमा देखाएको बेसक्याम्पको उचाइचाहिँ करिब ४ हजार २५० मिटर छ । 

विश्वमा योभन्दा उचाइमा पनि रंगशाला बनेको छ । त्यो हो ड्यानियल अलसिस्ड्स क्यारिओन । ४ हजार ३३८ मिटर उचाइमा रहेको यो फुटबल रंगशाला पेरुमा छ ।

वालेन्द्र सरकारको शासकीय सुधारका १०० सय कार्यसूचीमा सुदूरपश्चिमका हिमाल पनि समेटिएका छन् । ती स्थानमा व्यवस्थित पर्यटनका लागि  आवश्यक अध्ययन गरी एक महिनाभित्र कार्यान्वयन योग्य खाका प्रस्तुत गर्ने कुरा उल्लेख छ ।  

अछामको रामारोशन, बाजुराको बडिमालिका र दार्चुलाको अपि हिमाल ट्रेकिङ रुट सरकारको उच्च प्राथमिकतामा छ ।

सरकारको १०० कार्यसूचीमा समेटिएका सुदूरपश्चिमका हिमाल- बन्लान् त आकर्षक गन्तव्य ?

अपि र साइपाल आधार शिविरसम्म पुग्ने मार्गमा रहेका झरना, तालतलयैया तथा नदीनाला, रंगिबिरंगी फूलले ढाकेका पाटन र भौगोलिक तथा जैविक विविधताको संयोजनले यो क्षेत्र आरोहीका लागि मात्र नभएर पदयात्री र पर्यावरणमा चासो राख्नेका लागि समेत नौलो अनुभव दिलाउने खालको रहेको छ । यहीँ सम्भावनालाई साकार रूप दिनका लागि दार्चुलाको अपिहिमाल र बझाङको साइपाल तथा सूर्मा गाउँपालिकासँगको समन्वयमा नेपाल पर्यटन बोर्डको दिगो पर्यटन परियोजनाले अपि साइपाल पदयात्रा मार्गको विकासको लागि काम गरिरहेको छ ।