काठमाडौं — जेन-जी आन्दोलनका बेला काठमाडौंका प्रमुख जिल्ला अधिकारी रहेका छविलाल रिजालले केन्द्रीय सुरक्षा समितिको बैठकका सुरक्षा तयारीबारे भएको छलफलका विवरणबारे जाँचबुझ आयोगलाई जानकारी दिएको खुलेको छ । 

आयोगको प्रतिवेदनमा समावेश उनको बयानमा प्रहरी महानिरीक्षक (आईजीपी) चन्द्रकुँवेर खापुङले प्रदर्शनमा ‘कथंकदाचित बल प्रयोग गर्नुपर्ने स्थिति आयो भने के गर्ने भन्नेबारे लाइन अफ एक्सन स्पष्ट हुनुपर्छ’ भन्दै निर्देशन मागेको उल्लेख छ । जवाफमा बल प्रयोगको सिद्धान्तअनुसार सिलसिलेवार रुपमा न्यूनतम बल प्रयोग गर्दै स्थिति नियन्त्रणमा लिनु भनिएको उनले बयान दिएका छन् । उनले भनेका छन्,' ‘तर त्यसबाट पनि स्थिति नियन्त्रणमा नआएर निषेधित क्षेत्र उल्लंघन, हुलदंगा, तोडफोड र आगजनी जस्ता उच्छृंखल गतिविधि भएमा सावधानीपूर्वक आवश्यक बल प्रयोग गरी स्थिति नियन्त्रणमा लिनु भन्ने निर्देशन प्राप्त भएको थियो ।’

२३ भदौ ७ बजेदेखि नै आफूले जिल्ला सुरक्षा समितिको कमाण्ड सेन्टर खडा गरी पदाधिकारीसँगै बसेर अवस्थाको अनुगमन गरेको उनले बताएका छन् । प्रदर्शनकारीहरू ब्यारिकेड तोडेर अगाडि गएपछि गृहसचिवलाई जानकारी गराएको उनले बताएका छन् । ‘उहाँबाट सिलसिलेवार रुपमा न्यूनतम बल प्रयोग गरी स्थिति नियन्त्रणमा लिनु भन्ने निर्देशन प्राप्त भयो,’ उनले भनेका छन् । 

त्यसपछि आफूले प्रदर्शनकारी संसद् भवनतर्फ बढ्दै शान्ति भंग हुने अवस्था देखेपछि गृहमन्त्री, मुख्यसचिव र गृहसचिवलई फोन गरेर कर्फु लगाउनुपर्ने अवस्था आएको जानकारी गराएको भनेका छन् । त्यसपछि कर्फु आदेश जारी भएको उनले भनेका छन् । 

उनले आफूले घुँडाभन्दा तल लक्षित गरी रबरको गोली चलाउने मौखिक आदेश दिएको भए पनि अन्तिम बल अर्थात सिधै गोली चलाउने आदेश नदिएको दाबी गरेका छन् ।