बझाङ — निर्वाचन निष्पक्ष र धाँधलीरहित हुनेमा ढुक्क हुन गृहमन्त्री ओमप्रकाश अर्यालले मतदातालाई अनुरोध गरेका छन् । निर्वाचन सुरक्षा तयारीसम्बन्धी अनुगमनको लागि बझाङ पुगेका अर्यालले निर्वाचनमा बुथ कब्जा र फर्जी मत हाल्ने कोसिस गर्नेलाई नियन्त्रणमा लिएर मुद्दा चलाइने बताए । 

'विगतका निर्वाचनमा बझाङमा यस्ता गतिविधि भएको रेकर्ड छ । यो पाला त्यसो हुन नदिनका लागि सुरक्षा व्यवस्थाले पूरा तयारी गरेको छ,' गृहमन्त्री अर्यालले भने, 'सर्वप्रथम अवाञ्छित गतिविधि नगर्न सम्झाइबुझाइ गर्ने र नमानेमा नियन्त्रणमा लिएर कसुर अनुसार कारबाही गर्नेसम्मको तयारी गरिएको छ ।'

सुरक्षा निकायका प्रमुखसँगको छलफलपछि आफूले निर्वाचनलाई शान्तिपूर्ण वातावरणमा सम्पन्न गर्नका लागि भएको तयारी अत्यन्तै चुस्त पाएको बताए । उनले अहिलेको सरकार कुनै राजनीतिक दलको नभई नागरिक सरकार भएकोले पनि निर्वाचनमा कसैलाई गलत गतिविधि गर्न नदिइनेमा जोड दिए । बाजुरा र बझाङमा बुथ कब्जा, झडप र फर्जी मत हाल्ने प्रवृत्तिबारे केही दिनअघि कान्तिपुर दैनिकमा विस्तृत रिर्पोट प्रकाशन भएको थियो ।