झापा — झापाको सदरमुकाम भद्रपुर सुरक्षाका दृष्टिले सधैं मजबुत मानिन्छ । किनकि यहाँ नेपाल प्रहरी, सशस्त्र प्रहरी बल र नेपाली सेना-तीनवटै सुरक्षा निकायको बलियो उपस्थिति छ । आसन्न निर्वाचनलाई लक्षित गर्दै यस क्षेत्रको सुरक्षा व्यवस्था अझै कडा पारिएको छ ।

यहाँ बिहीबार साँझ एउटा अनौठो र त्रासदीपूर्ण घटना घट्यो । ‘सिरिन्ज आक्रमण’ भनिएको उक्त घटनामा भद्रपुर नगरपालिका–१० सत्रविघेका खेम ढकालले ज्यान गुमाए । यो घटनाले एउटा व्यक्तिको जीवन मात्रै समाप्त गरेन, सिंगो सहरलाई नै भय र आशंकामा डुबायो । 

सुरक्षित मानिने सहरमै, त्यो पनि साँझको समयमा, सिरिन्ज प्रयोग गरी आक्रमण हुनु आफैंमा गम्भीर र अस्वाभाविक घटना हो । यही कारण ‘सिरिन्ज आक्रमण’ अहिले देशभर चासोको विषय बनेको छ । ‘सिरिन्ज आक्रमण’ घटनामा भएको के थियो ? ५ प्रश्नमा बुझौं :

घटना कसरी भयो ?

जिल्ला प्रहरी कार्यालय झापाका प्रवक्ता डीएसपी खगेन्द्र खड्काका अनुसार बिहीबार साँझ खेम ढकाल छिमेकीको घरबाट आफ्नो निवासतर्फ जाँदै थिए । त्यस क्रममा बाटोमै अज्ञात व्यक्तिहरूले उनलाई आक्रमण गरे । प्रत्यक्षदर्शी नहुँदा घटना झनै रहस्यमय बन्यो । आक्रमणपछि ढकाल अचेत अवस्थामा फेला परेका थिए । उपचारका क्रममा स्थानीय अस्पतालमा उनको मृत्यु भयो । 

घटनाको वास्तविकता के हो ?

प्रहरीको प्रारम्भिक अनुसन्धानले यो सामान्य झगडा वा आकस्मिक हमला नभई योजनाबद्ध आक्रमणका साथै पुरानो रिसइबी हुन सक्ने संकेत गरेको छ । आक्रमणमा धारिलो हतियार वा गोली नभई सिरिन्ज प्रयोग हुनु आफैंमा अस्वाभाविक र गम्भीर विषय मानिएको छ । प्रहरीले घटनास्थल वरपरका सीसीटीभी फुटेज, मोबाइल कल विवरण र फरेन्सिक प्रमाण संकलन गरिरहेको छ । आक्रमणकारीसमेत पक्राउ परिसकेकाले वास्तविकता चाँडै सार्वजनिक हुने प्रहरीको दाबी छ । 

आक्रमणमा सिरिन्जको प्रयोग किन गरियो ?

अनुसन्धानमा संलग्न स्रोतका अनुसार सिरिन्ज प्रयोग गर्नुको उद्देश्य पीडितलाई तत्काल प्रतिरोध गर्न नदिने वा अचेत बनाउने हुन सक्ने आशंका गरिएको छ । सिरिन्जमा के पदार्थ प्रयोग गरिएको थियो भन्ने विषय पोस्टमार्टम र फरेन्सिक रिपोर्टपछि मात्र स्पष्ट हुने प्रहरीले जनाएको छ । तर, शल्यक्रिया अघि चिकित्सकले बिरामीलाई लठ्याउन(बेहोस पार्न) प्रयोग गर्ने वस्तु प्रयोग भएको हुन सक्ने प्रहरीको अनुमान छ । सिरिन्जमा प्रयोग गरिएको एनेस्थेसियाको अत्यधिक डोजका कारण ढकालको मृत्यु भएको हुन सक्ने प्रहरीको अनुमान छ । 

आक्रमण गरिनुको कारण के हुन सक्छ ?

प्रहरीका अनुसार मृतकसँगको व्यक्तिगत रिसइबी, पारिवारिक विवाद वा अन्य सामाजिक कारण उक्त घटना भएको हुन सक्छ । तर, ठोस प्रमाण प्रहरीले फेला पारिसकेको छैन । प्रहरीले घटनालाई व्यक्तिगत कारणसँग जोडेर पनि अनुसन्धान गरिरहेको छ । आक्रमण आकस्मिक नभई लक्षित रूपमा भएको देखिएकाले कारण गहिरो हुन सक्ने आशंका गरिएको छ ।