काठमाडौँ — जेन–जी आन्दोलनका क्रममा गोली लागेर सख्त घाइते भएका प्रकाश बोहोरा ५ महिनापछि राष्ट्रिय ट्रमा सेन्टरबाट डिस्चार्ज भएका छन् ।

गत भदौ २३ गते नयाँ बानेश्वरस्थित संसद् भवनअघि भएको प्रदर्शनका क्रममा उनको देब्रे खुट्टामा गोली लागेको थियो । गोली लाग्दा नसामा गहिरो चोट पुगेपछि उनलाई लामो समय आईसीयुमा राखेर उपचार गर्नुपरेको थियो ।

प्रकाश जेन–जी आन्दोलनका ती अनुहार हुन्, जसको रगत लतपतिएको जुत्ता आन्दोलनकै ‘आइकोनिक प्रतीक’ बनेको थियो । अस्पतालका सुरुवाती साढे ३ महिनाको बसाईं आफ्नो लागि ‘नर्कको बसाइ’जस्तै रहेको प्रकाश सम्झन्छन् ।

सुशासनका पाइला पर्खिरहेको जुत्ता

‘त्यो समय असह्य थियो, लगातार प्यानिक हुन्थ्यो,’ उनले भने, ‘नसाको दुखाइ यति धेरै थियो कि कहिलेकाहीँ मर्नु नै सजिलो लाग्थ्यो ।’

पछिल्लो डेढ महिनामा भने स्वास्थ्यमा केही सुधार आएको र अहिले दुखाइ निकै कम भएको उनले बताए । 

प्रकाशको उपचारका लागि उनकी आमा नन्दा बोहोरा असोज ३ गते काठमाडौँ आइपुगेकी थिइन् । यतिन्जेल छोराको स्याहारमा जुटेकी उनी डिस्चार्जको खबरले खुसी त छन्, तर चिन्ता नसकिएको बताउँछिन् ।

‘घर जान पाइन्छ भन्ने सोच्दा खुसी लाग्छ,’ उनले भनिन्, ‘तर खुट्टाको नसा कत्तिको बलियो हुन्छ, भविष्यमा के हुन्छ भन्ने डर पनि उस्तै छ ।’ डाक्टरका अनुसार नसाले पूर्ण रूपमा काम गर्न अझै समय लाग्नेछ । केही समयपछि पुनः फलोअप र थप उपचार आवश्यक पर्ने बताइएको छ ।

प्रकाश बोहोरा हाल राष्ट्रिय स्वतन्त्र पार्टी (रास्वपा) को तर्फबाट आसन्न प्रतिनिधिनसभा निर्वाचनको समानुपातिक उम्मेदवारतर्फको बन्दसूचीमा चौथो नम्बरमा छन् । उनले अब आफू राजनीतिक यात्रामा सक्रिय हुने बताए ।