काठमाडौँ — बाराको परवानीपुर गाउँपालिका–१, रहरियाडीमा आमाछोराको हत्या भएको घटनामा बुहारीको विवाहेत्तर सम्बन्ध जोडिएको हुन सक्ने देखिएको प्रहरीले जनाएको छ ।

जिल्ला प्रहरी कार्यालय, बाराका प्रमुख एसपी नरेन्द्र कुँवरका अनुसार, घटनामा संलग्न रहेको आरोपमा मृतक ४६ वर्षीया सुमित्रादेवी मण्डलकी बुहारी मनिता र धिरेन्द्र महतो धानुक नामक व्यक्ति पक्राउ परेका छन् । ‘प्रारम्भिक जाँचमा यसमा विवाहेत्तर सम्बन्ध जोडिएको जस्तो देखिन्छ,’ उनले कान्तिपुरसँग भने ।

बुधबार बिहान राति सुमित्रादेवी मण्डल र उनका २४ वर्षीय छोरा रामेश्वर मण्डलको धारिलो हतियार प्रहार गरी हत्या भएको थियो । घटनाबारे थाहा पाएलगत्तै प्रहरीले अनुसन्धान थालेको थियो । त्यसक्रममा प्रहरीले वैदेशिक रोजगारीका लागि दुबई गएर ११ माघमा फर्किएका धिरेन्द्रबारे थाहा पाएको थियो ।

उनीहरुबीचको सम्बन्धबारे परिवारमा थाहा भएपछि खटपट सुरु भएको प्रहरी बताउँछ । त्यसपछि नै आमाछोराको हत्या भएको जस्तो देखिएको प्रहरीको भनाइ छ । ‘त्यो सम्बन्धबारे सूचना पाउने बित्तिकै धिरेन्द्रको खोजी गरेका थियौं, त्यसक्रममा उनी भागेर गइसकेको पाइयो,’ एक अनुसन्धान अधिकृतले भने, ‘प्राविधिक जाँच गरेर खोजी गर्दा उनी भारत पुगिसकेको पाइएको थियो ।’