‘कांग्रेसले लिन नसक्ने पहल र निर्णयका कारण सिर्जना भएका राजनीतिक संकटप्रति हामी गम्भीर आत्मसमिक्षा तथा आत्मलोचना गर्दै क्षमा याचना गर्छौं।’
काठमाडौँ — विशेष महाधिवेशनमा महामन्त्री गगन थापाले पेश गरेको समसामयिक राजनीतिक प्रस्तावमा कांग्रेसले विगतमा गरेका गल्तीप्रति आत्मालोचित भएको उल्लेख गरेका छन्।
प्रतिवेदनमा लेखिएको छ, ‘कांग्रेसले लिन नसक्ने पहल र निर्णयका कारण सिर्जना भएका राजनीतिक संकटप्रति हामी गम्भीर आत्मसमिक्षा तथा आत्मलोचना गर्दै क्षमा याचना गर्छौं ।’
प्रतिवेदनमा कांग्रेसको विगतदेखि अहिले पार्टीले तय गर्नुपर्ने बाटोसम्मका विषय समेटिएका छन्। जसमा जेन–जी विद्रोह र कांग्रेसको संकल्प छुट्टै शीर्षकमा उल्लेख गरिएको छ।
थापाले भदौ २३ र २४ गते भएका घटना तथा गम्भीर मानवअधिकार उल्लंघन र हिंसाजन्य ज्यादतीका घटनामा स्वतन्त्र छानबिन हुनुपर्नेमा कांग्रेस प्रष्ट रहेको उल्लेख गरेका छन्। उनले कांग्रेसले विगतमा सरकार र संसदमा रहँदा सुशासन र सेवा प्रवाहका सन्दर्भमा गरेको पहल अपूर्ण भएको र प्रभावकारी ढंगले अघि बढाउन नसकेको कुरा आत्मआलोचनासहित स्वीकार गर्दै, त्यस्ता कमी–कमजोरी नदोहोर्याउने प्रतिबद्धता व्यक्त गरेका छन्।
प्रतिवेदनमा क्षेत्रीय शक्ति असन्तुलनको विषय पनि समेटिएको छ। प्रतिवेदनमा उल्लेख छ कि ‘विश्वको सामरिक सन्तुलन एक ध्रुवबाट दुई ध्रुव हुँदै बहुध्रुवतर्फ अगाडि बढ्दा देखिएका क्षेत्रीय तथा अन्तर्राष्ट्रिय असन्तुलनसँग सामना गर्न सक्ने कूटनीतिक क्षमता अभाव देखिएको छ।’
सम्बन्धित समाचार
