काठमाडौँ — एमाले अध्यक्ष केपी शर्मा ओलीले देशमा तत्काल निर्वाचन हुने वातावरण अझै बनिनसकेको बताएका छन्।

सचिवालय बैठकमा एमाले र कांग्रेस नजिकिँदै गएपछि सरकार र केही विदेशी शक्तिहरू आफैं निर्वाचनलाई सार्ने वा विभिन्न चरणमा विभाजन गरेर गराउने षड्यन्त्र गरिरहेको दाबी गरे।

सर्वोच्च अदालतका न्यायाधीशहरूलाई समेत निरन्तर दबाब र धम्की दिने तथा संसद् पुनःस्थापना हुन नदिने कार्यमा दबाब दिइरहेको उल्लेख गर्दै यसले लोकतान्त्रिक मूल्य–मान्यतामाथि गम्भीर प्रश्न उठाएको बताउनुभयो। नेपालको अस्तित्व र राष्ट्रिय अखण्डता जोगाउने कार्य चुनौतीपूर्ण बन्दै गएको छ र वैदेशिक हस्तक्षेप नाङ्गो रूपमा देखिन थालेको आरोप लगाए।

‘यस्तो परिस्थितिमा पार्टीले आन्दोलनलाई जुझारु र सशक्त ढंगले अघि बढाउनुपर्छ,’ उहाँले जोड दिनुभयो। प्रत्येक तहमा युवाको सक्रिय परिचालन गर्दै टोल–टोलमा नेसनल युथ भोलिन्टियर्स फोर्स गठन गर्नुपर्ने र निर्वाचनको तयारी आन्दोलनकै मैदानबाट सुरु गर्नुपर्ने छ, उनले भने।

२४ कार्तिकमा एमालेले सुरु गरेको घर फर्क अभियान कार्यक्रममा बोल्दै ओलीले  टोल टोलामा सुरक्षा दस्ता गठन गर्ने बताएका थिए । ३ पुसमा तेस्रो कार्यकालका लागि निर्वाचित भएपछि पनि ओलीले यही कुरा दोहोर्याएका थिए । उनले सरकारको मात्रै भर पर्दा धोका पाउन सकिने भन्दै एक हप्ताभित्र देशभर टोल–टोलमा सुरक्षा समिति बनाउन निर्देशन दिएका थिए । उनले आफ्नै खुट्टामा उभिएर आफ्नै सुरक्षा गर्नुपर्ने भन्दै अहिले देशमा असुरक्षा रहेको बताउँदै भनेका थिए, ‘टोल–टोलमा सुरक्षा समिति अविलम्ब बनाउनुहोस्। एक हप्ताभित्र।’