काठमाडौँ — अत्यधिक प्रयोगकर्ता र भरखर सिस्टम तयार भएकाले मतदाता नामावलीको अनलाइन दर्तामा बेलाबेला प्राविधिक समस्या तथा ढिलासुस्ती देखिएको छ । 

राष्ट्रिय परिचयपत्र तथा पञ्जीकरण विभागका सूचना प्रविधि निर्देशक लोकराज शर्माका अनुसार निर्वाचन आयोगको प्रणाली र राष्ट्रिय परिचयपत्र प्रणाली एकीकृत भएयताको छोटो अवधिमै ठूलो संख्यामा नागरिकहरूले मतदाता नामावलीमा आफ्नो नाम दर्ता गराएका छन् । 

निर्देशक शर्माका अनुसार बिहीबार दिउँसोदेखि शुक्रबारसम्म ३७ हजार ६ सय जनाले राष्ट्रिय परिचयपत्रको प्रयोग गरी मतदाता नामावली दर्ता गराइसकेका छन् ।

अनलाइन दर्तामा देखिएको प्राविधिक समस्याबारे गुनासो आइरहेको स्विकार्दै निर्देशक शर्माले सुधारको प्रयास भइरहेको बताए । ‘प्रणाली भर्खर जोडिएको हुनाले र एकैचोटि धेरै ट्राफिक आएकाले प्राविधिक समस्या देखिएको हो,’ उनले भने, ‘यस कारण घरीघरी ढिलो हुने गरेको छ ।’