काठमाडौँ — २३ र २४ भदौमा भएको जेन-जी आन्दोलन र प्रदर्शनका घटना छानबिन गर्न गठन भएको जाँचबुझ आयोगले बयानलाई तीव्रता दिएको छ । आयोगले २३ गते माइतीघर मण्डलदेखि तीनकुनेसम्म र अन्य महत्त्वपूर्ण स्थानमा खटिएका प्रहरी जवानदेखि अधिकृत हुँदै बयान लिने कार्यसूची बनाएको छ । 

बयान लिनुअघि आयोगले प्रहरी प्रधान कार्यालयसँग भदौ २३ र २४ गते फिल्डमा खटिएका सबै सुरक्षाकर्मीको विवरण उपलब्ध गराउन भन्दै पत्र लेखेको थियो । फिल्डमा खटिएका सुरक्षा निकायका जवानदेखि फिल्ड अधिकृतसम्मको विवरण र आदेश दिने अधिकृतहरूको तहगत विवरण उपलब्ध गराउन आयोगले निर्देशन दिएको थियो ।

आयोगले जिम्मेवारीअनुसारको तह र व्यक्ति खुलाएर विवरण पठाउन भनेको थियो । '२३ गते कसले गोली चलायो ? कसले आदेश दियो ? किन चलायो ?' लगायतका प्रश्न सोधेर अध्ययनका लागि विवरण माग गरेको थियो । तर प्रहरीले केही दिनअघि आयोगलाई पठाएको जवाफमा जेन-जी आन्दोलनका क्रममा प्रहरी महानिरीक्षकदेखि प्रहरी जवानसम्म सबै फिल्डमै खटिएको जवाफ दिएको छ ।

प्रहरीको यस्तो जवाफपछि आयोगले आइतबार पुन: २४ घण्टाभित्र सबै विवरण उपलब्ध गराई बयानमा सहयोग गरिदिन भनी पत्र पठाएको छ। २३ र २४ गते अलग-अलग बयान लिनुपर्ने र तत्कालीन समयमा माइतीघर मण्डलदेखि तीनकुनेसम्म खटिएका व्यक्ति र अन्यत्र खटिएका सुरक्षाकर्मीको अवस्था फरक-फरक भएकाले समग्र जवाफ नभई नाम र समयसहित उपलब्ध गराइदिन आयोगले भनेको छ। आयोगका अनुसार प्रहरीले सोमबारसम्म जवाफ दिएमा उनीहरूको बयान क्रमश: सुरु हुने छ ।