काठमाडौँ — कांग्रेस संस्थापनपक्षको बैठक ललितपुरको धोबीघाटमा बसेको छ । कार्यबाहक सभापति पुर्णबहादुर खड्काले विहीबारदेखि सुरु हुने केद्रीय कार्यसमितिको बैठकमा सामूहिक धारणा तय गर्न बैठक बोलाएका हुन् । 

बैठकमा अधिकांश नेताहरुले मंसिरमै नियमित वा विशेष कुनैपनि महाधिवेशन सम्भव नभएको धारणा राखीरहेका छन् । यता दुई महामन्त्री गगन थापा र विश्वप्रकाश शर्माले मंसिरमा नियमित महाधिवेशनको तालिका ल्याउने निर्णय बैठकले नगरेमा विशेष महाधिवेशनको प्रकृया अघि बढाउनुपर्ने अडान राखेका छन् ।

उनीहरुले एमाले, माओवादीलगायतका राजनीतिक दलले अधिवेशन गर्न नसक्ने कुरा तर्कसंगत नभएको भन्दै विहीबारकै बैठकमा कार्यतालिका प्रस्तुत गर्ने प्रयास गरेका छन् । त्यस सम्वन्धमा कसरी प्रस्तुत हुने भन्नेबारेमा संस्थापनपक्षले साझा धारणा बनाउन बैठक बोलाएको हो । 

मंसिरमै नियमित महाधिवेशन नभए विशेष महाधिवेशन हुन्छ कि हुँदैन ? विशेष महाधिवेशनसमेत नबोलाइए ५४ प्रतिशत महाधिवेशन प्रतिनिधिहरूको हस्ताक्षरसहितको निवेदनको औचित्य के हुन्छ ? महाधिवेशनको मुद्दामा कांग्रेसका दुई खेमाबीच प्रतिष्ठाको विषय बनिरहेको छ ।