काठमाडौँ — जेन–जी विद्रोहले ल्याएको परिवर्तनलाई संस्थागत गर्न पूर्वप्रधानन्यायाधीश सुशीला कार्कीको नेतृत्वमा नयाँ सरकार गठन हुने सम्भावना बढेको छ । सेनाको अग्रसरतामा बुधबार भएको छलफलमा जेन–जी प्रतिनिधिले पूर्वप्रधानन्यायाधीश कार्कीको नेतृत्वमा अन्तरिम सरकार बनाउने प्रस्ताव अघि सारेका हुन् । 

जेन–जीले विश्वास गरेका नेता बालेन्द्र शाहले पनि समर्थन गरेकाले कार्कीको नेतृत्वमा सरकार बन्ने पक्काजस्तै भएको हो । नाम तय गर्नुअघि जेन–जी समूहले ‘भर्चुअल’ मतदान गराएको थियो । त्यसमा ५० प्रतिशत मत कार्कीका पक्षमा परेको थियो । ‘भर्चुअल’ छलफलमा काठमाडौं महानगरका प्रमुख बालेन्द्र शाह (बालेन), विद्युत् प्राधिकरणका पूर्वकार्यकारी निर्देशक कुलमान घिसिङलगायत नाममा पनि छलफल भएको थियो ।