पक्राउ परेकी किरणले मन्त्रीलाई ‘धम्की’ दिएको भनिएको एउटा अडियो सामाजिक सञ्जालमा भाइरल छ । गत शुक्रबारदेखि सामाजिक सञ्जालमा भाइरल भएको अपुष्ट अडियोमा खानेपानी मन्त्रीलाई किरणले चर्को स्वरमा कराएको सुनिन्छ । वीरगन्जमा हैजा फेलिनुमा मन्त्री जिम्मेवार रहेको भन्दै ती महिलाले मन्त्रीलाई यसबारे प्रश्न गरेको अडियोमा सुनिन्छ । हैजाका कारण जनता अस्पतालमा भर्ना भएको तर खासै मतलब नराखेको भन्दै ती महिलाले मन्त्रीलाई कराएको अडियोमा सुनिन्छ ।

साथै अडियोमा ती महिलाले आफ्नो परिवार पनि हैजाका कारण अस्पतालको आईसीयूमा रहेको मन्त्रीसँग चर्को स्वरमा कुरा गरेकी छिन् । किरणले आईसीयूमा भर्ना भएका परिवारको स्तरीय उपचार नभएको भन्दै उनले मन्त्रीलाई ‘तपाईंलाई छोड्दिनँ, मलाई डर लाग्दैन’ भन्दै चुनौती दिएको अडियोमा सुनिन्छ । अडियोमा ती महिलाले भनेकी छिन्– ‘मेरो घरकै मान्छे आईसीयूमा भर्ना छ मन्त्रीजी । मैले छोड्दिनँ, मलाई डर लाग्दैन ।’

वीरगन्जमा हैजाले धेरैलाई समस्या पार्दा पनि मन्त्रीले कुनै कदम नलिएको भन्दै किरणले मन्त्रीमाथि आक्रोस पोखेको सुनिन्छ । मन्त्री यादवलाई फोनमार्फत मार्ने धम्की दिएको आरोपमा साहलाई शनिबार पक्राउ गरेको डीएसपी लम्सालले बताए । 

डीएसपी लम्सालका अनुसार बयानका क्रममा उनले मन्त्रीलाई मार्ने धम्की दिएको स्वीकार गरेकी छन् । ‘फोनबाट मारिदिन्छु भन्ने खालका धम्की दिएको रहेछ । मन्त्रीज्यूको सचिवालयबाट उजुरी आएपछि हामीले पक्राउ गरेका हौं,’ उनले भने । 

उनीविरुद्ध साइबर अपराध, सांसदलाई ज्यान मार्ने धम्की दिन नहुने र झुटो कुराको अफवाह फैल्याएको गरी तीन वटा अपराधसम्बन्धी कसूरमा मुद्दा चलाइएको डीएसपी लम्सालले बताए । डीएसपी लम्सालका अनुसार, शनिबार वीरगन्जबाट पक्राउ परेकी साहलाई अदालतमा सोधपुछपछि आइतबार जिल्ला अदालतमा पेस गरिएको थियो । अदालतले अनुसन्धानका लागि तीन दिनको म्याद दिएको छ । डीएसपी लम्सालले साहमाथि जुनजुन अपराधको दाबी गरिएको त्यही विषयमा केन्द्रित रहेर मात्र अनुसन्धान भइरहेको बताए । 

पूर्वसंघीय सांसद तथा पूर्व मन्त्री करिमा बेगमले जिम्मेवार जनप्रतिनिधिले जनतालाई थुन्न लगाएर गलत गरेको बताइन् । ‘लोकतन्त्रमा जनताले नेतालाई गाली गर्छन्, नेता भएपछि त्यति सुन्ने हिम्मत पनि हुनुपर्छ ?,’ उनले भनिन्, ‘म पनि सांसद र मन्त्री भइसकेकी हुँ, जनता जनार्दनको पीडा र आक्रोश हामीले नसुने कसले सुन्ने ।’ उनले किरणको अविलम्ब रिहाई नभए महिलाहरूले आफ्नो प्रदर्शन सशक्त बनाउने चेतावनी दिइन् ।

किरणको रिहाइको माग गर्दै सोमबार जिल्ला प्रहरी कार्यालय पर्सा परिसरबाहिर प्रदर्शन गरेका थिए । प्रदर्शनमा सहभागी महिलावादीहरूले किरणले जनप्रतिनिधिलाई आफ्नो गुनासो पोख्दा हत्याराकै आरोप लगाएर थुन्नु गलत भएको बताए । हातमा विभिन्न नारा लेखिएका प्ले कार्ड बोकेका उनीहरूले किरणले संघीय सरकारका खानेपानी मन्त्री प्रदीप यादवलाई फोन गरेर आफ्नो पीडा पोख्दा जेल नै हाल्नुपर्ने अपराध नगरेको जिकिर गर्दै रिहाईको माग गरे ।

समाजवादी दलित मुक्ति समाजकी केन्द्रीय कोषाध्यक्ष ताराकुमारी रामले किरणले नेपाल सरकारको जिम्मेवार मन्त्री र जनप्रतिनिधिलाई आफ्नो गुनासो राख्दा अपराधीसरह व्यवहार गर्नु सरासर गलत भएको बताइन् । ‘के लोकतन्त्रमा एक आमनागरिकले आफ्नो पीडा र गुनासो पनि पोख्न पाउँदैनन् त ?,’ उनले भनिन्, ‘जनप्रतिनिधिले आम जनताको गुनासो र आक्रोश सुन्नु पर्नेमा उल्टै थुन्न लाउने यो कस्तो लोकतन्त्र हो ।’