रौतहट — बन्द सुटकेसभित्र मृत भेटिएकी माधवनारायण-६ माधोपुरकी ३० वर्षीया रुबी साहको हत्या आरोपीलाई प्रहरीले थप उपचारका लागि काठमाडौं पठाएको छ । शरीर जलेर गम्भीर घाइते अवस्थामा बुधबार बिहान प्रहरीले फेला पारेको लक्ष्मण पासवानको अनुहार र शरीर जलेको छ ।

आत्महत्याको प्रयास गर्नुअघि पासवानले ९ मिनेटको भिडियो बनाएर रुबीको हत्या गरेको भनेर स्वीकारेका छन् । पासवानले बनाएको भिडियो अहिले सामाजिक सञ्जालमा भाइरल भएको छ ।

गत शनिबार राति रुबीको हत्या गरी पासवानले सुटकेसमा राखेर गौर–सिर्सिया खण्डको मुडबलवा गेटनजिक छाडेर भागेका थिए । घटनापछि विभिन्न कोणबाट अनुसन्धानमा खटिएको प्रहरीले पासवानले नै हत्या गरेको भनेर ठम्याइसकेको थियो । उनको खोजी गर्ने क्रममा पासवानकै घर भएको माधोपुरमा शरीरमा आगो लगाएको अवस्थामा भेटिएको जिल्ला प्रहरीका डीएसपी राजु कार्कीले जानकारी दिए ।

‘हत्याको कारणबारे हामी गहिरिएर अनुसन्धान गर्दैछौँ । प्रेम प्रंसग पनि भन्ने आएको छ,’ उनले भने,‘अहिले नै यसो हो भन्न सकिँदैन । तर पासवानको भिडियो सुन्दा विगतमा दुवैबीच केही न केही सम्बन्ध हुन सक्छ । हामी बुझ्दै छौँ ।’ रौतहटको गरुडास्थित बेटर अस्पतालमा उपचारपछि पासवानलाई कीर्तिपुरस्थित बर्न अस्पतालमा थप उपचारका लागि पठाइएको डीएसपी कार्कीले बताए ।