पोखरा — पोखराको सिर्जना बहिरा आवासीय माध्यमिक विद्यालयमा देखिएको विवाद समाधान गर्न छानबिन समिति गठन हुने भएको छ । विद्यालयमा व्याप्त बेथितिको विरोधमा उत्रिएका विद्यार्थी र अभिभावकले राखेका माग पूरा गर्न छानबिन समिति गठन गर्ने निर्णय पोखरा-२६ को वडा कार्यालयमा सोमबार भएको हो । यो सहमतिसँगै विद्यार्थीहरूले सबै आन्दोलनका कार्यक्रम स्थगित गरेका छन् ।

केही समयअघि विद्यालयमा अध्ययनरत विद्यार्थी विजय विकलाई त्यहीँकी एक बहिरा छात्रामाथि जबर्जस्ती करणी गरेको आरोप लगाइएको थियो । विद्यालय प्रशासनले विजयलाई उनका अभिभावकलाई समेत जानकारी नदिई प्रहरीको जिम्मा लगाएको थियो । उक्त घटनामा विजयले सात महिनासम्म जेल जीवन बिताउनुपर्‍यो ।

तर, अदालतले उनलाई निर्दोष ठहर गर्दै सफाइ दिएपछि विद्यार्थीले विजयमाथि षड्यन्त्र गरिएको बताउँदै आएका थिए ।विजयका बुबा प्रविण विश्वकर्माले विद्यालयमा व्याप्त भ्रष्टाचार र राजनीतिक पहुँचका कारण आफ्नो छोरालाई फसाइएको आरोप लगाएका थिए । गण्डकी बहिरा संघका अध्यक्ष किसान तामाङ र विद्यार्थी प्रतिनिधि भेषराज ढकालले पनि यस घटनालाई विद्यालय प्रशासनको कमजोरी र व्यक्तिगत प्रतिशोधका रूपमा चित्रण गरेका थिए ।

सिर्जना बहिरा आवासीय विद्यालयका विद्यार्थी आन्दोलित

विजयलाई न्याय मिले पनि अन्य विद्यार्थीहरूमा 'भोलि हामीलाई पनि फसाइन्छ कि' भन्ने त्रास पैदा भएको थियो । यही त्रास र विद्यालयको अव्यवस्थाविरुद्ध विद्यार्थीहरूले आइतबारदेखि पठनपाठन ठप्प पारी आन्दोलन गर्दै आएका थिए । उनीहरूको मुख्य माग प्रधानाध्यापक सुनील भण्डारीसहित पाँचजना शिक्षक तथा कर्मचारीलाई सरूवा गरी कारबाही गर्नु थियो । विद्यार्थीहरूको आन्दोलनपछि वडा कार्यालयको सक्रियतामा सोमबार भएको सर्वपक्षीय भेलामा विद्यार्थी र सरोकारवालाबीच सहमति भएको हो । 

वडाध्यक्ष नरेन्द्र थापाका अनुसार, विद्यार्थीले उठाएका सबै समस्याको छानबिन गर्न महानगरको शिक्षा महाशाखालाई पत्राचार गरिने भएको छ । छानबिनपछि दोषी ठहरिएका जोकोहीलाई कारबाही गरिने प्रतिबद्धता उनले व्यक्त गरे ।

अध्यक्ष थापाले विद्यार्थीहलाई कुनै पनि समस्या भए सिधै वडा कार्यालयमा सम्पर्क गर्न आग्रह गरे । फरक प्रकृतिको विद्यालय भएकाले सिर्जना बहिरा माविको समस्या समाधानका लागि आफू गम्भीर रहेको उनले बताए । विद्यार्थी भेषराज ढकालले छानबिन पश्चात आफ्ना माग पूरा नभए पुनः आन्दोलनमा उत्रिने बताए ।