काठमाडौँ — अभद्र व्यवहारको कसुरमा धरौटी माग गरिएका चक्रे मिलन धरौटी रकम बुझाएर पनि तत्काल रिहा नहुने भएका छन् । काठमाडौं जिल्ला अदालतका न्यायाधीश खिमानन्द भुसालको बुधबारको इजलासले मिलनसहित १९ जनालाई धरौटीमा छाड्न आदेश दिएको थियो ।

उनीसँगै धरौटी माग गरिएको अन्य प्रतिवादी धरौटी रकम बुझाएर आजै रिहा भए पनि मिलनलाई भने एक वर्ष अघिको मुद्दाको अनुसन्धानका लागि प्रहरी वृत्त ठिमी लगिने भएको छ ।

जिल्ला प्रहरी परिसर भक्तपुरका प्रहरी उपरीक्षक माधव बुढाथोकीका अनुसार पहिले नै ठिमीको एक रेस्टुरेन्टमा भएको घटनामा अदालतमा मुद्दा दर्ता भएको थियो । ‘जाहेरवालाले वतन खुलाएपछि सरकारी वकिल कार्यलयबाट बयान लिने लगायतका काम समेत भएकाले थप अनुसन्धानको लागि थुनामा नै राख्न लागेका हौं,’ उनले भने,‘हामीले उनलाई सोझै काठमाडौं परिसरबाट प्रहरी वृत्त ठिमी लानेछौं । ’

मनिष रायमाझीले ज्यान मार्ने उद्योगमा सर्लाहीका अजित खवाससहित योजनाकारका रुपमा २०८१ भदौ १० गते मिलनका विरुद्ध जाहेरी दर्ता गराएका थिए । त्यसबेला मिलनको वतन नखुलेकाले पहिचान भएको थिएन । हाल पहिचान भएपछि मिलनमाथि पूरक अनुसन्धान सुरु भएको हो । अदालतले यसअघि मागदाबी नपुगेको भन्दै खवासलाई छोडिसकेको छ ।