माओवादी स्थायी समितिले पार्टीभित्रको विवाद समाधान गर्दै नेकपासँग एकता गर्ने नयाँ निर्णय गरेको छ।
काठमाडौँ — माओवादीका वरिष्ठ उपाध्यक्ष नारायणकाजी श्रेष्ठ र नेकपाका महासचिव नेत्रविक्रम चन्दबीच भेटवार्ता भएको छ । बुधबार हात्तीवनस्थित श्रेष्ठ निवासमा दुई नेताबीच करिब एक घण्टा भेटघाट र छलफल भएको छ।
भेटमा समसामयिक राजनीतिक परिस्थिति, नेकपा र माओवादीबीच पार्टी एकताको सम्भावनाबारे पनि दुई नेताबीच छलफल भएको छ ।
माओवादीको स्थायी समिति बैठकले आफ्नो पार्टीभित्रको अन्तरसंघर्ष समाधान गरी नेकपासँग एकता गर्ने निर्णय गरेको हो ।
शनिबार पार्टी केन्द्रीय कार्यालय पेरिसडाँडामा सुरु भएर सोमबार सम्पन्न भएकाे माओवादी स्थायी समिति बैठकले उक्त निर्णय गरेको हो ।
गत पुसमा भएको केन्द्रीय समितिमा पनि नेकपालगायत विचार मिल्ने दलसँग एकता गर्ने माओवादीले निर्णय गरेको थियो । तर प्रक्रिया अघि नबढेपछि चन्द नेतृत्वको नेकपाले चासो नदिएको भन्दै एकताको च्याप्टर करिब बन्द भएको नेताहरूले बताउन थालेका थिए ।
