सिन्धुली — सिन्धुलीको गोलन्जर गाउँपालिका-६, छेत्पानजिक भण्डास विप्पर कटेरीको हायू परिवार रहस्यमयी तरिकाले सम्पर्कविहीन भएको छिमेकीहरूको भनाइ छ । स्थानीय मोतिराज सापकोटाका अनुसार ४ दिनअघि बिहीबार सुँगुर काटेर भोज गरेपछि सम्पर्कविहीन भएका हुन् ।

घरपारि रहेको गोठमा पाडीलाई घासँ र कुँडो दिन गइरहने हायू परिवारलाई नदेखेपछि छिमेकी उनीहरूको घरमा पुगेका थिए । त्यसपछि छिमेकीहरूले नै जनप्रतिनिधि र प्रहरीलाई खबर गरेका हुन् ।

एकलासमा रहेको घरमा सोमबार प्रहरीसहितको टोली पुग्दा कोही पनि भेटिएनन् । वडाध्यक्ष रविनकुमार श्रेष्ठका अनुसार उनीहरूको घरमा अझै पनि सुँगुरको ३/४ किलो मासु बाँकी रहेको छ । 'सोमबार हामी उनीहरूको घरमा पुग्दा मासु बाँकी नै देखियो । गन्हाएको अवस्थामा मासु भेटिएकाले पनि उनीहरू ३/४ दिनअघि नै घरमा नरहेको हो कि भन्ने छ ।' 

सिन्धुलीमा हायू परिवारका १६ जना ४ दिनदेखि सम्पर्कविहीन

हराएकाहरूमा उर्मिलासहित उनका ६ जना छोरा, ६ जना छोरी, १ जना बुहारी, १ जना नाति र १ जना ज्वाइँ रहेका छन् । उर्मिलाका श्रीमान् साने हायूको २ वर्षअघि निधन भइसकेको छ । वडाध्यक्ष श्रेष्ठका अनुसार शुक्रबार केहीले उनीहरूलाई खुर्कोटमा देखेको दाबी गरे पनि यकिन भने भएको छैन ।

पछिल्लो समय मोबाइलको लोकेसन रामेछापको मन्थली देखिए पनि सबैको मोबाइल स्विच अफ रहेको उनले बताए ।  उनीहरूको घरबाट नजिकको सडकमार्ग पुग्न झन्डै २ घण्टा हिँड्नुपर्छ । त्यहाँबाट मध्यपहाडी लोकमार्गको बलेनी र हैबार पुगेर गाडी चढ्न सकिन्छ ।  हैबारबाट खुर्कोट ५ किमि र त्यहाँबाट मन्थली १९ किलोमिटर रहेको छ । त्यस्तै बलेनीबाट खुर्कोट ८ किलोमिटर रहेको छ ।

सम्पर्कविहीन हुनुअघि हायू परिवारका १६ जनाले नै सामाजिक भत्ता बुझेका थिए

वडाध्यक्ष श्रेष्ठका अनुसार भान्साघर जलेको अवस्थामा छ । साथै भाँडाहरू अस्तव्यस्त भेटिएको छ । खोरमा पाँचवटा बाख्रा समेत भोकै अवस्थामा रहेका र कुकुर रोइरहेको अवस्थामा भेटिएको छ । अल्पसंख्यक लोपोन्मुख हायू जाति भएकाले सामाजिक सुरक्षा भत्ता लिँदा वडा तथा पालिकामा फोन नम्बर हुने भएकाले सम्पर्कको प्रयास गरिराखिएको अध्यक्ष श्रेष्ठले बताए । ‘कहाँ गए, कता गए अत्तोपत्तो छैन,’ श्रेष्ठले भने, ‘सम्पर्क गर्ने प्रयास जारी छ ।’