काठमाडौँ — गत वर्ष त्रिभुवन अन्तर्राष्ट्रिय विमानस्थलमा सौर्य एयरलाइन्सको जहाज दुर्घटना हुँदा १८ यात्रुले ज्यान गुमाए । पाइलटको भने जीवितै उद्धार गरिएको थियो । दुर्घटनासम्बन्धी जाँचबुझ आयोगले तयार पारेको प्रतिवेदन शुक्रबार सार्वजनिक भएको छ । 

प्रतिवेदनले दुर्घटनाको मुख्य कारणमा खराब मौसम, जहाजको इन्जिन वा अरू प्राविधिक समस्या नभई पाइलटको त्रुटिलाई औंल्याएको छ । विमानस्थलबाट ९ साउन २०८१ मा पोखराका लागि उड्ने क्रममा जहाज दुर्घटनामा परेको थियो । 

प्रतिवेदनले नेपालमा आन्तरिक उडानमा रहेका वायुसेवा कम्पनीको उडान सुरक्षामा शंका गर्नुपर्ने थुप्रै विषयलाई पनि इंगित गरेको छ । त्यसमाथि नियमनकारी निकायमा दक्ष जनशक्तिको अभाव देखिन्छ । अन्तर्राष्ट्रिय नागरिक उड्डयन संगठन (आईकाओ) ले सुझाएका सिफारिस पनि राम्ररी पालना भएको देखिँदैन । सरकारले पनि यस विषयलाई गम्भीरतापूर्वक लिएको छैन ।