काठमाडौँ — गृहमन्त्रीले राजीनामा नगरेसम्म संसद् चल्न नदिने माओवादीको निर्णय, कांग्रेसका पूर्वसांसद आफताब आलमलाई मस्तिष्कघात, नेपाल भित्रियो यस वर्षको मनसुनदेखि पन्जाबलाई सजिलै हराएर बेंगलुरु फाइनलमासम्मका खबर आज चर्चामा रहे ।

०००

भिजिट भिसा प्रकरणमा गृहमन्त्री रमेश लेखकले राजीनामा दिनुपर्ने माग गर्दै विपक्षी दलहरूले संसद् अवरुद्ध पारेपछि सभामुख देवराज घिमिरले कार्यव्यवस्था परामर्श समितिको बैठकअघि प्रमुख दलका प्रमुख सचेतक र सचेतकहरूलाई छलफलमा बोलाएका थिए ।

०००

कांग्रेसका पूर्वसांसद मोहम्मद आफताब आलमलाई मस्तिष्कघात भएपछि उपचारका लागि अन्नपूर्ण न्युरो अस्पताल भर्ना गरिएको छ । शुक्रबार उनको स्वास्थ्यमा समस्या देखिएपछि आईसीयूमा राखेर उपचार भइरहेको अन्नपूर्ण न्युरोका मेडिकल डाइरेक्टर डा. सुदन ढकालले बताए । रौतहटमा भएको बम विस्फोटका अभियुक्त आलम बुधबार साँझ ललितपुरस्थित नख्खु कारागारबाट रिहा भएका थिए ।  

०००

यस वर्षको मनसुन नेपाल भित्रिएको छ । जल तथा मौसम विज्ञान विभाग, मौसम पूर्वानुमान महाशाखाका अनुसार बिहीबार रातिदेखि नेपालको पूर्वबाट प्रवेश गरी कोशी प्रदेशका अधिकांश भू-भागमा विस्तार भइसकेको छ । महाशाखाले शुक्रबार बुलेटिन जारी गर्दै कोशी प्रदेशका अधिकांश मौसम केन्द्रहरूमा हल्कादेखि मध्यम मनसुनी वर्षा भएको जनाएको छ ।  

०००

सप्तरीको छिन्नमस्ता गाउँपालिका-६ कोचाबखारीस्थित वडा कार्यालयसँगै जोडिएको सिंगो सदा (मुसहर) बस्ती नै शौचालयविहीन रहेको छ । ‘जेकर घरमे चर्पी नइँ, ओकर घरमे शादी नइँ’ (जसको घरमा चर्पी छैन, उसको घरमा विवाह हुँदैन) मूल नाराका साथ २०७४ चैत २१ मै सप्तरीलाई खुल्ला दिशामुक्त क्षेत्र घोषणा गरिसकेको छ ।