काठमाडौँ — गृहमन्त्रीको राजीनामा माग्दै प्रतिपक्षीद्वारा संसद् अवरुद्ध, गभर्नर पौडेलको योग्यतामाथि प्रश्न उठाउँदै सर्वोच्चमा रिट दर्ता, सोताङ खोलामा डाइभर्सन बनाएर पृथ्वी राजमार्ग एकतर्फी सञ्चालनमादेखि लिभरपुलका समर्थकको परेडमा कारको ठक्कर : ४७ घाइते, ४ जनाको अवस्था चिन्ताजनकसम्मका खबर आज चर्चामा रहे । 

००००

प्रतिनिधिसभाको आजको बैठक सूचना टाँस गरेर भोलि बिहान ११ बजेसम्मका लागि स्थगित गरिएको छ । आजको बैठक प्रतिपक्षद्वारा अवरोध गरेपछि सभामुख देवराज घिमिरेले आधा घण्टाका लागि स्थगन गरेका थिए । आधा घण्टापछि पनि बैठक सुचारु नभएपछि सूचना टाँस गरेर दिउँसो साढे २ बजेसम्मका लागि बैठक स्थगित गरिएको थियो ।

००००

नवनियुक्त गभर्नर विश्वनाथ पौडेलको योग्यतामाथि प्रश्न उठाउँदै सर्वोच्च अदालतमा रिट दर्ता भएको छ । विशाल थापासहितका अधिवक्ताहरुले आज रिट दर्ता गरेका हुन् । रिटमा प्रधानमन्त्री तथा मन्त्रिपरिषद् कार्यालय, अर्थ मन्त्रालय, गभर्नर सिफारिस समिति, नेपाल राष्ट्र बैंक केन्द्रीय कार्यालयलाई पनि प्रतिवादी बनाइएको छ । रिटमाथि बुधबार पेसी तोकिएको छ ।

००००

पृथ्वी राजमार्गअन्तर्गत धादिङको थाक्रे गाउँपालिका–७ स्थित सोताङ खोलाको पुलमा भ्वाङ परेपछि अवरुद्ध भएको सडक डाइभर्सन बनाएर एकतर्फी रुपमा संचालनमा आएको छ । नागढुंगा मलेखु सडक योजना प्रमुख केशवप्रसाद ओझाले सवा ४ बजेबाट सडक संचालनमा आएको बताए । उनले सडक र पुल जोड्ने स्थानको माटो बगेपछि भ्वाङ परेको र त्यहाँ माटो भरेर पुलबाटै गाडी पास गराउने प्रयास भइरहेको बताए ।