काठमाडौँ — माओवादीद्वारा मारिएका दैलेखका पत्रकार डेकेन्द्र थापाको घरमा माओवादी अध्यक्ष तथा पूर्वप्रधानमन्त्री पुष्पकमल दाहाल पुगेका छन् ।
'जनतासँग माओवादीः मध्यपहाडी लोकमार्ग अभियान' अन्तर्गत दैलेख पुगेका दाहालले पत्रकार थापाको शालिकमा माल्यार्पण गरेका थिए । त्यसअघि दाहालले थापाको घरमा गएर परिवारका सदस्यलाई भेटेका थिए ।
दाहालको सचिवालयका अनुसार सोमबार दाहालले थापाको परिवारलाई भेटेको हो । 'अध्यक्ष प्रचण्डले दैलेखका पत्रकार डेकेन्द्र थापाको सालिकमा माल्यार्पण गर्नुभएको छ । माल्यार्पणअघि अध्यक्ष प्रचण्डले उहाँको घरमा गई आमासँग र परिवारसँग भेटघाट गर्नुभएको थियो,' दाहालको सचिवालयले भनेको छ ।
माओवादी नेतृत्वको जनयुद्धका क्रममा पत्रकार थापा मारिएका थिए । थापालाई माओवादी कार्यकर्ताले अपहरणपछि कुटपिट गरेर मारेका थिए । २०६१ साउन २७ मा एक विद्यालयको कक्षाकोठामा थापा मारिएका थिए ।
उक्त घटनामा संलग्न तीन जनालाई २०७८ मंसिरमा जिल्ला अदालत दैलेखले जन्मकैदको सजाय सुनाएको थियो ।
