काठमाडौँ — राजावादीको प्रदर्शनमा चैत १५ मा गोली लागेर घाइतेमध्ये एक डिल्लीप्रसाद लुइँटेलको ट्रमा अस्पतालमा उपचार चलिरहेको छ । अस्पतालको छैटौं तल्लामा रहेको वार्डमा उनी उपचारसँगै लोकसेवाको पनि तयारी गरिरहेका छन् ।

‘कोशी र लुम्बिनी प्रदेशको पाँचौँ तहको परीक्षा फर्म भरेर पनि दिन पाइनँ, शिक्षासेवा आयोगको जेठ १७ गते परीक्षा हुदैँछ त्यो पनि दिन जान सक्ने अवस्था छैन,’उनले भने, ‘निको भएपछि त परीक्षा दिने हो । त्यसैले तयारी गरिरहेको छु ।’

उनी अहिले शिक्षक सेवा आयोगको आधारभूत तहको किताब पढिरहेका छन् । ‘फुर्सदको समयमा मोबाइलमा गेम खेल्छु नत्र किताब नै पढ्छु,' उनले भने ।

भोजपुरको टेम्केमैयुङ–६, लोखर्क घर भएका २७ वर्षीय डिल्लीप्रसाद लुइँटेल काठमाडौंमा बसको टिकट काउन्टरमा काम गर्दै लोकसेवाको तयारी गरिरहेका थिए । १५ चैतमा राजावादीको प्रदर्शनका कारण बस नचलेर फुर्सदिला बनेपछि उनी साथीहरूसँगै प्रदर्शन हेर्न पुगेका थिए । त्यही बेला पेटमा गोली लागेर उनी घाइते भए । ‘हस्पिटलबाट कहिले निस्कन पाइन्छ होला जस्तो भएको छ । मेरो नै भरमा घर खर्च चलेको थियो,’ उनले थपे, ‘एक महिना भयो माहिलो भाइ मसँगै अस्पतालमा कुरुवाको रुपमा छ । दुई भाइ गाउँकै स्कुलमा पढ्छन्, पारिवारिक कारणले बैनी कलेज जान छाडिन् ।’

उनका अनुसार आमा क्यान्सरले बितेपछि परिवारको जिम्मेवारी आफैँले धानेका थिए । घाइतेको उपचार सरकारले नै गर्छ भने पनि अस्पतालबाहिर औषधि किन्दा र खाना बस्दाको खर्च झन्डै डेढ लाख रुपैयाँ पुगेको उनले सुनाए । ‘अस्पतालमा पैसा तिर्नुपरेको छैन । बाहिर औषधी किन्नुपर्‍यो भने त पैसा अनिवार्य चाहियो,’ उनले निराश हुँदै भने, ‘लोकसेवाको तयारी राम्रोसँग गरौँला, पुरानो घरलाई नयाँ बनाउला, भाइबहिनीको पढाइमा सहयोग गरौंला र आफू पनि बिहेवारी गरौँला भन्ने थियो तर सबै सपनाहरु अधुरो हुने डर छ ।’

खुट्टा टेकेर हिँड्न मिलेको छैन । चिकित्सकले अझै ३ महिना बस्नुपर्ने बताएका छन् । आन्द्राको अप्रेसन अझै बाँकी रहेको उनले बताए । अस्पतालबाट निस्किएपछि पहिलेझैँ काम गर्न सकिएला कि नसकिएला भन्ने उनलाई चिन्ता छ । सरकारले रोजगारीमा सहयोग गर्दियोस् भन्ने उनको अपेक्षा छ ।