काठमाडौँ — कालीमाटी तरकारी बजारका एक मजदुरको हत्या, ओडिसा घटनाबारे परराष्ट्रमन्त्री राणा र भारतीय मन्त्रीबीच फोनवार्तादेखि रुस-युक्रेन युद्ध अन्त्य गर्ने शक्ति आफूसँग भएको ट्रम्पको भनाइसम्मका खबर आज चर्चामा रहे । 

०००

काठमाडौँको कालीमाटी तरकारी बजारमा बुधबार बिहान मृत भेटिएका मजदुरको उनकै साथीहरूले हत्या गरेको खुलासा भएको छ । प्रहरीका अनुसार तरकारी बजारमा काम गर्ने ४१ वर्षीय रामकृष्ण दाहालको हत्या भएको हो । टाउको र शरीरका विभिन्न भागमा घाउचोट लागेको अवस्थामा कालीमाटीस्थित उनको कोठानजिकै शव फेला परेको थियो । बुधबार बिहान कोठा नजिकै शव भेटिएपछि स्थानीयले प्रहरीलाई खबर गरेका थिए । 

०००

परराष्ट्रमन्त्री आरजु राणा देउवाले भारतको ओडिसास्थित कलिङ्गा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयको होस्टेलमा नेपाली विद्यार्थी प्रकृति लम्सालको मृत्यु र त्यसपछि विकसित परिस्थितिका विषयमा ओडिसाका उच्च शिक्षा मन्त्रीसँग टेलिफोनमा कुराकानी गरेकी छन् । मन्त्री राणाले ओडिसाका उच्च शिक्षामन्त्री सूर्यवंशी सुरजसँग लम्सालको मृत्युको निष्पक्ष अनुसन्धान र दोषीमाथि कानुनी कारबाहीका साथै त्यहाँका नेपाली विद्यार्थीहरूलाई कलेजमा सुरक्षित वातावरणसहित पठनपाठनको व्यवस्थाका लागि आग्रह गरेकी छन् ।