काठमाडौँ — संसद्को हिउँदे अधिवेशन डाक्ने मन्त्रिपरिषद्को निर्णयदेखि डोनाल्ड ट्रम्पले अमेरिकाको ४७औं राष्ट्रपतिका रूपमा शपथ लिँदै गरेको समाचार सोमबार कान्तिपुरमा प्रकाशित भएका छन् । 

मन्त्रिपरिषद् बैठकले संसद्को हिउँदे अधिवेशन माघ १८ गतेदेखि बोलाउने निर्णय गरेको छ । सोमबार बसेको मन्त्रिपरिषद् बैठकले संसद्को हिउँदे अधिवेशन यही माघ १८ गते आह्वान गर्नका लागि राष्ट्रपतिसमक्ष सिफारिस गर्ने निर्णय भएको खानेपानीमन्त्री प्रदीप यादवले जानकारी दिए । विपक्षी दलहरूले संसद् अधिवेशन नबोलाई अध्यादेशबाट सरकार चलाउन खोजिरहेको भन्दै आलोचना गरिरहेका बेला मन्त्रिपरिषद् बैठकले संसद् अधिवेशन बोलाएको हो । 

त्यस्तै काठमाडौं जिल्ला अदालतले स्वर्णलक्ष्मी सहकारी ठगीका मुख्य अभियुक्तमध्येका एक पूर्वडीआईजी छविलाल जोशीलाई ५० लाख धरौटीमा छाड्न आदेश गरेको छ । न्यायाधीश ठाकुरप्रसाद खरेलको एकल इजलासले दुई दिनको सुनुवाइपछि जोशीलाई पूर्पक्षका लागि धरौटीमा छाड्ने आदेश गरेको हो ।

त्यसैगरी आजको आर्थिक खबरमा निर्यात व्यापार वृद्धिसम्बन्धी विषय छ । मुलुकको निर्यात व्यापार ३२ प्रतिशतले बढेको छ । भन्सार विभागले सोमबार सार्वजनिक गरेको व्यापारको तथ्यांकअनुसार ६ महिनामा ९८ अर्ब ७८ करोड ९२ लाख रुपैयाँको वस्तु निर्यात भएको छ । यो रकम गत आर्थिक वर्षको सोही अवधिमा ३१.७८ प्रतिशत बढी हो । आर्थिक वर्ष २०८०/८१ को पहिलो ६ महिनामा ७४ अर्ब ९६ करोड ८० लाख रुपैयाँको निर्यात भएको थियो ।