काठमाडौँ — आज सुप्रिम सहकारी ठगी प्रकरणमा रवि र छविविरुद्ध रूपन्देहीमा मुद्दा दर्ता, वरिष्ठ अधिवक्ता त्रिपाठीमाथि भएको भौतिक आक्रमणको विरोधमा कानुन व्यवसायीको प्रदर्शनदेखि इजरायल-हमास युद्धविराम, विपिन जोशी पहिलो चरणमा नछुट्नेसम्मका समाचार चर्चामा रहे । 

०००

सुप्रिम सहकारीको रकम अपचलनसम्बन्धी रवि लामिछाने र छविलाल जोशीसहित पुरक अभियोगका १४ र सुरु मुद्दाका २८ सहित ४२ जनाविरुद्ध रूपन्देही अदालतमा मुद्दा दर्ता भएको छ । रवि, छवि र लक्ष्मी पौडेलसहितलाई सहकारी ठगी र संगठित अपराधको कसुरमा १० करोड १९ लाख ३६ हजार रुपैयाँ बिगो माग गरिएको पूरक अभियोजन आइतबार दर्ता भएको हो । 

०००

वरिष्ठ अधिवक्ता दिनेश त्रिपाठीमाथि भएको भौतिक आक्रमणको विरुद्धमा कालोपट्टी बाँधेर कानुन व्यवसायीहरूले विरोध जनाएका छन् । आइतबार नेपाल बार एसोसियसन परिसरमा कानुन व्यवसायीहरूले हातमा कालोपट्टी बाँधेर विरोध जनाएका हुन् । सर्वोच्च अदालत बार एसोसियसनको आह्वानमा बारका सदस्यहरूले हातमा कालोपट्टी बाँधेर विरोध जनाएका हुन् । 

०००

प्यालेस्टिनी समूह हमासको नियन्त्रणमा रहेका नेपाली नागरिक विपिन जोशी युद्धविरामको पहिलो चरणमा नछुट्ने भएका छन् । इजरायलले हमासले युद्धविरामको पहिलो चरणमा रिहा हुने ३३ बन्धकहरूको सूची सार्वजनिक गरेको छ । सार्वजनिक सूचीमा विपिनको नाम भने समावेश छैन् ।