काठमाडौँ — नेकपा माओवादी केन्द्रका अध्यक्ष एवम् पूर्वप्रधानमन्त्री पुष्पकमल दाहालले संविधान कार्यान्वयनका विषयहरूमा ठूला दलहरू गम्भीर नभएको आरोप लगाएका छन् ।

उनले आफू १८ महिना सरकारमा हुँदा संविधान कार्यान्वयन र संघीयता सबलीकरणका लागि हरप्रयास गरेको, तर ठूला दलहरूको साथ नपाएका कारण नतिजा ल्याउन नसकेको बताए ।

बुधबार कान्तिपुर मिडिया ग्रुपले आयोजना गरेको कान्तिपुर कन्क्लेभ-२०२४ अन्तर्गत 'प्रचण्ड पथ : सडक कि सत्ता' विषयक सत्रमा बोल्दै अध्यक्ष दाहालले संविधानले जनताको अधिकारका सवालमा थुप्रै व्यवस्थाहरू गरेपनि कार्यान्वयन नहुँदा जनतामा निराशा छाएको स्वीकारे । 

'हामीले संविधानमा मौलिक अधिकार, संघीयता र समावेशिताको विषयमा जे अधिकारहरु जनतालाई दिने भनेका थियौं । त्यो नै हामीले जनतालाई दिन सकेनौं । संविधानमा भएकै कुरालाई पनि इमान्दारिता साथ, जिम्मेवारपुर्वक र गम्भीरताको साथ कार्यान्वयन गर्नेतिर लागेनौँ,' उनले भने, 'खासगरी संख्यात्मकरुपमा जो पार्टीहरु छन् । ती पार्टीहरु यो विषयमा गम्भिर भएनन् । उनीहरूले संविधान बनाउने बेलामा जेनतेन समझदारी गरे, तर कार्यान्वयन गर्ने बेलामा त्यसप्रति गम्भीर भएनन् भन्ने मेरो आलोचना हो ।'