आन्तरिक उडान रद्द भएका कारण अन्तर्राष्ट्रिय गन्तव्यमा जान नपाएका यात्रुको हवाई टिकट सारेबापत अतिरिक्त शुल्क नलिन अन्तर्राष्ट्रिय वायुसेवा कम्पनीहरूलाई पर्यटन तथा नागरिक उड्डयन मन्त्रालयको निर्देशन
काठमाडौँ — प्रतिकूल मौसमका कारण शनिबार करिब ७८ प्रतिशत आन्तरिक उडान रद्द गरिएको छ । शनिबारका लागि २ सय ९४ उडानको तालिका रहेकामा ६४ वटा मात्र आन्तरिक उडान हुन सकेको हो । शुक्रबार राति ७ बजेदेखि रोकिएको आन्तरिक उडान शनिबार अपराह्न ४ बजेपछि आंशिक रूपमा खुला गरिएको थियो ।
त्रिभुवन अन्तर्राष्ट्रिय विमानस्थलका महाप्रबन्धक जगन्नाथ खनालका अनुसार शनिबार अपराह्न ४ बजेपछि धनगढी, नेपालगन्ज, भैरहवा र पोखरामा दुईतर्फी गरेर बुद्ध, यती र श्री एयरलायन्सले ६४ वटा उडान गरेका थिए । बुद्धले १ सय ४८ वटा उडान गर्ने तालिका सार्वजनिक गरेकामा ३६, यतीका ६२ वटामध्ये १० र श्रीले निर्धारित ४६ वटामा १८ वटा मात्रै उडान गरेको हो । मौसममा सुधार नभएका कारण पूर्वी नेपालका विमानस्थलतर्फ भने उडान हुन सकेन । विराटनगर, जनकपुर, सिमरा र भरतपुरमा शुक्रबार रोकिएका बुद्ध एयरका जहाज भने शनिबार फर्केका थिए ।
नेपाल नागरिक उड्डयन प्राधिकरणका सहप्रवक्ता ज्ञानेन्द्र भुलका अनुसार ‘कन्ट्रोल्ड एरोड्रोम’ अन्तर्गत पर्ने विराटनगर, जनकपुर, सिमरा, पोखरा, भैरहवा, नेपालगन्ज र धनगढीमा उपकरणको सहायतामा हुने उडान (आईएफआर) गर्न मिल्ने गरी खुला गरिएको थियो तर चार वटा विमानस्थलमा मात्र उडान भयो । सामान्य दिनमा आन्तरिक उडान सरदर राति ११ बजेसम्म हुने गर्छ तर शनिबार ९ बजेअघि नै सबै आन्तरिक उडान रोकिएका थिए ।
शनिबार बिहानको मौसम खराब हुँदा दुबईबाट काठमाडौं आउँदै गरेको फ्लाई दुबईको जहाज काठमाडौंमा अवतरण हुन नसकेर भारतको लखनउ ‘डाइभर्ट’ भएको थियो । फ्लाई दुबईको जहाज दिउँसो १२ बजे लखनउबाट काठमाडौं आएको थियो । चीनको ल्हासाबाट आएको सिचुवान एयरको विमान ल्हासा र छेन्दुबाट आएको एयर चाइना उतै फर्केका थिए । अन्तर्राष्ट्रिय उडानतर्फ शनिबार ५२ वटा आउने र ५३ वटा फर्किने तालिका थियो ।
मौसममा सुधार हुनेबित्तिकै आन्तरिक विमानस्थल नियमित रूपमा सञ्चालन गर्न प्राधिकरणलाई संस्कृति, पर्यटन तथा नागरिक उड्डयन मन्त्रालयले निर्देशन दिएको छ । आन्तरिक उडान रद्द भएका कारण अन्तर्राष्ट्रिय गन्तव्यमा जान नपाएका यात्रुको हवाई टिकट सारेबापत अतिरिक्त शुल्क नलिन पनि मन्त्रालयले अन्तर्राष्ट्रिय वायुसेवा कम्पनीहरूलाई निर्देशन दिएको छ । पर्यटनमन्त्री बद्री पाण्डेले सरोकारवालासँग बैठक गरी आन्तरिक उडान अवरुद्ध हुँदा विदेश उड्न नपाएका यात्रुलाई अतिरिक्त शुल्क नलिन निर्देशन दिएका हुन् । प्राधिकरणको आधिकारिक अनुरोध पत्र पाएपछि आइतबार विदेशमा रहेका आफ्ना मुख्यालयमा अनुरोध गरेर मात्रै मन्त्रीको निर्देशनबारे निर्णय लिने विदेशी वायुसेवाका प्रतिनिधिहरूले बताएका छन् ।
यस्तै, उडान अवरोध भएका कारण अतिरिक्त समय बस्नुपर्ने पर्यटकलाई होटल र खानामा सहुलियत तथा नियमित शुल्कमा प्रदान गर्न मन्त्रालयले स्टार तथा पर्यटकीयस्तरका होटलहरूको छाता संगठन होटल संघ नेपाल (हान) लाई आग्रह गरेको छ । उद्धारमा प्रयोग हुने निजी हेलिकोप्टर कम्पनीहरूलाई पनि अतिरिक्त शुल्क नलिई नियमित र सहुलियत शुल्कमा चार्टर उडान गर्न मन्त्रालयले निर्देशन दिएको छ । मन्त्रालयले नेपालमा भएका सबै राफ्टिङ कम्पनीलाई डुबान तथा बाढीमा जनशक्ति र उपकरण परिचालन गर्न पनि अनुरोध गरेको छ ।
हिमपातले मनास्लु आरोहण प्रभावित
गोरखा– चुमनुब्री गाउँपालिका–१ सामागाउँस्थित साम्दोमा भारी हिमपात हुँदा लार्केपासका लागि हिँडेका पर्यटक बाटामै रोकिएका छन् । मनास्लु हिमाल आरोहणका लागि आएका पर्यटक पनि मध्य असोजमै भएको हिमपातले आधार शिविरमै रोकिएका छन् ।
आधार शिविरमा रहेका चुमनुब्री–३ पाङसिङका बुद्ध गुरुङका अनुसार शुक्रबार बिहानबाट लगातार हिमपात भएको थियो । शनिबार दिउँसोबाट हिमपात रोकिए पनि अघि बढिहाल्न सकिने स्थिति छैन । ‘धेरैजसो आरोहण गरेर फर्किसकेका थिए, बाँकी रहेको पछिल्लो ग्रुप अहिले बेस क्याम्पमै रोकिएको छ,’ उनले भने, ‘हिमपात नरोकिए दुई/चार दिन आरोहण गर्न गाह्रो छ ।’
हिउँ परेपछि जाडो बढेर आधार शिविरको बसाइ कष्टकर बनेको गुरुङले बताए । पर्यटन विभागका अनुसार ८ हजार १ सय ६३ मिटर उचाइको मनास्लु आरोहणका लागि यस सिजनमा २८ समूहका ३ सय ८ जनाले अनुमति लिएका थिए ।
मनास्लु क्षेत्र घुम्न पुगेका पर्यटक पनि हिमपातका कारण रोकिएका छन् । चुमनुब्री–१ साम्दोमा शुक्रबार रातिबाट हिमपात भएको सशस्त्र प्रहरीको बीओपी साम्दोका इन्स्पेक्टर विश्व त्रिपाठीले जानकारी दिए । उनका अनुसार लार्केपासका लागि साम्दो पुगेका करिब ३० पर्यटक साम्दोमा छन् । ‘साम्दो बस्ती क्षेत्रको पैदलमार्गको हिउँ पन्छाइएको छ,’ इन्स्पेक्टर त्रिपाठीले भने, ‘पदमार्ग क्षेत्रको अन्य खण्डमा पनि हिउँ पन्छाउन सशस्त्र प्रहरीको टोली खटिएको छ ।’
