मन्त्रिपरषद्मा उठेन 'अर्थमन्त्री प्रकरण', मन्त्रीहरू भन्छन्- 'त्यो राजनीतिक विषय हो'- समाचार - कान्तिपुर समाचार
कान्तिपुर वेबसाईट
AdvertisementAdvertisement

मन्त्रिपरषद्मा उठेन 'अर्थमन्त्री प्रकरण', मन्त्रीहरू भन्छन्- 'त्यो राजनीतिक विषय हो'

कान्तिपुर संवाददाता

काठमाडौँ — बजेट निर्माणका क्रममा अनधिकृत व्यक्तिहरूलाई अर्थमन्त्रालयमा प्रवेश गराई करका दर हेरफेर गरेको र त्यो प्रकरणलाई ढाकछोप गर्न अर्थमन्त्रालयको सीसीटीभी फुटेज डिलिट गरी विवादमा आएका अर्थमन्त्री जनार्दन शर्माको विषयमा मंगलबार बसेको मन्त्रिपरिषद् बैकमा प्रधानमन्त्री शेरबहादुर देउवा र मन्त्रीहरूले छलफल गरेका छैनन् ।

मन्त्रीहरूका अनुसार अर्थमन्त्री शर्माको उक्त प्रकरण राजनीतिक भएको र राजनीतिक तहबाट नै हल गर्नुपर्ने भएकाले मन्त्रिपरिषद्मा कुरा नउठेको हो ।

अर्थमन्त्रीका कारण संसद्‍ र सडकमा चर्को विरोध भइरहँदा पनि मन्त्रिपरिषद्मा भने कुरा नउठेको हो । कानुन, न्याय तथा संसदीय मामिलामन्त्री गोबिन्दप्रसाद शर्मा कोइरालाले भने, 'अर्थमन्त्रीको विषयमा कुनै कुरा उठेन । त्यो राजनीतिक विषय हो त्यो ।'

उद्योग वाणिज्य तथा आपूर्तिमन्त्री दिलेन्द्रप्रसाद बडूले राजनीतिक रूपमा नै शिर्ष नेताहरूले सल्टाउनुपर्ने विषय भएको बताए । उनले भने, 'यो मन्त्रिपरिषद्मा उठ्ने विषय होइन ।' भौतिक पूर्वाधार तथा यातायात व्यवस्थामन्त्री मोहम्मद इस्तियाक राईले पनि अर्थमन्त्रीबारे मन्त्रिपरिषद्को बैठकमा कनै कुरा नउठेको बताए ।

अर्थमन्त्री शर्माले आगामी आर्थिक वर्षका लागि बजेटमा करका दर हेरफेर गर्ने क्रममा जेठ १४ गते राति अर्थमन्त्रालयमा अनधिकृत व्यक्तिहरूलाई प्रवेश गराएको भन्दै सरकारको पनि आलोचना भइरहेको छ । अर्थमन्त्रीले शर्माले भने उक्त आरोप अस्वीकार गर्दै आएका छन् । प्रमुख प्रतिपक्षी एमालेसँगै पछिल्लो समय सत्तारुढ दलका सांसदहरूले पनि अर्थमन्त्रीले राजीनामा दिनुपर्ने वा उनलाई प्रधानमन्त्री शेरबहादुर देउवाले बर्खास्त गर्नुपर्ने बताउन थालेका छन् ।

सार्वजनिक रूपमा पनि अर्थमन्त्रीको राजीनामा माग गरिएको छ । पूर्वप्रधानन्यायाधीश सुशीला कार्की, त्रिभुवन विश्वविद्यालयका पूर्वकुलपति केदारभक्त माथेमा र डा. गोविन्द केसीले सोमाबार मात्रै विज्ञप्ति जारी गरेर अर्थमन्त्रीलाई राजीनामा गर्न माग गरेका थिए । तर, मन्त्रिपरिषद्मा भने उक्त विषय उठेको छैन ।

प्रकाशित : असार २१, २०७९ १९:०६
प्रतिक्रिया
पठाउनुहोस्

अग्रिम हाजिर गर्ने भेरी अस्पतालका चिकित्सकलाई कारबाही सिफारिस

रुपा गहतराज

नेपालगन्ज — भेरी अस्पताल नेपालगन्जमा कार्यरत वरिष्ठ कन्सल्टेन्ट सर्जन डा सुरेशकुमार नागले अग्रिम हाजिर गर्ने गरेको पाइएपछि उनीमाथि कारबाहीको सिफारिस गरिएको छ ।

फाइल तस्बिर

डा नाग असार २० गते अस्पतालमा आएका थिए। उनले असार २९ गतेसम्मको हाजिरी गरेर गएको भेटिएपछि घटना बाहिर आएको हो । सोमबार (असार २० गते) अस्पताल पुगेर २९ गतेसम्मको अग्रिम हाजिरी गरेको पाइएपछि समितिले जिल्ला प्रशासन कार्यालय, बाँकेमा कारबाहीका लागि लेखिपठाएको छ। त्यसको बोधार्थ स्वास्थ्य तथा जनसंख्या मन्त्रालयमा पठाइएको छ।

डा नागले अस्पतालमा आफ्नो ड्युटी पूरा नगरेको भन्दै यसअघि पनि अस्पताल विकास समितिले २०७८ साल साउन २२ गते कारबाहीका लागि स्वास्थ्य तथा जनसंख्या मन्त्रालयलाई पत्र काटेको थियो ।

तर डा नागलाई अहिलेसम्म पनि कारबाहीको प्रक्रिया अघि बढ्न नसकेको अस्पताल विकास समितिका सदस्य कृष्णप्रसाद श्रेष्ठले बताए । अस्पतालमा हप्तामा दुई दिन मात्रै पालो पर्ने गर्छ। त्यही ड्युटीमा पनि डा नागले लापरबाही गर्ने गरेको अस्पताल विकास समितिका सदस्य श्रेष्ठले बताए । नेपालगन्जको पासाङल्हामु मार्गमा डा नागको आफ्नै वैष्णवी अस्पताल सञ्चालनमा रहेको छ । भेरी अस्पताल लुम्बिनी, कर्णाली र सुदूरपश्चिम प्रदेशको रिफरल सेन्टरको रुपमा रहेको छ।


प्रकाशित : असार २१, २०७९ १९:०२
पूरा पढ्नुहोस्
प्रतिक्रिया
पठाउनुहोस्
×