सभामुखले बोलाए कार्यव्यवस्था समिति बैठक
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
काठमाडौँ — सभामुख अग्निप्रसाद सापकोटाले प्रतिनिधिसभाको कार्यव्यवस्था परामर्श समितिको बैठक बोलाएका छन् । शुक्रबार दिँउसो १ बजे बस्ने प्रतिनिधिसभा बैठकका कार्यक्रम तय गर्नका लागि सभामुख सापकोटाले कार्यव्यवस्था परामर्श समितिको बैठक बोलाएका हुन् ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![सभामुखले बोलाए कार्यव्यवस्था समिति बैठक](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2021/third-party/agni-sapkota-2252021024050-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
सभामुखको सचिवालयका अनुसार शुक्रबार बिहान साढे ११ बजे बस्ने गरी कार्यव्यवस्था समितिको बैठक बोलाइएको छ । कार्यव्यवस्था परामर्श समितिको बैठक संघीय संसद् भवन नयाँ बानेश्वरको शंकर हलमा बस्नेछ ।
कार्यव्यवस्था समितिमा एमसीसी प्रतिनिधिसभा बैठकमा प्रस्तुत गर्ने प्रस्ताव सरकारले यसअघि नै राखेको छ । एमालेले भने बुधबारको कार्यव्यवस्था समिति बैठक बहिस्कार गरेको थियो । संसद् बैठक निरन्तर अवरोध गर्दै आएको एमालेले कार्यव्यवस्था समितिमा आफ्ना भनाइ राखेर बाहिरिँदै आएकोमा बुधबार भने बहिष्कार नै गरेको थियो ।
कार्यव्यवस्था समितिमा एमसीसीलाई प्रतिनिधिसभा बैठकमा प्रस्तुत गर्ने विषयमा सत्तारुढ गठबन्धनका दलहरूबीच मत मिलेको थिएन । कांग्रेसले एमसीसी प्रस्तुत गर्नुपर्ने धारणा राखेपनि माओवादी र एकीकृत समाजवादीले भने प्रतिनिधिसभा अवरोध भइरहेको अवस्थामा एमसीसी लगायत कुनै पनि विषय प्रवेश गर्न नसक्ने बताएका थिए ।
शुक्रबारका लागि सार्वजनिक गरिएको सम्भावित कार्यसूचीमा एमसीसी राखिएको छैन । कार्यसूचीको टुंगो कार्यव्यवस्था समिति बैठकपछि लाग्ने गर्छ ।
सत्तारुढ गठबन्धनमा एमसीसी संसद् बैठकमा प्रस्तुत गर्नेबारे बिहीबार साँझको बैठकमा सहमति जुटेको छैन । सत्तारुढ गठबन्धन शुक्रबार बिहान फेरि बैठक गर्ने तय भएको छ । सत्तारुढ गठबन्धनको बैठकपछि प्रतिनिधिसभा कार्यव्यवस्था समितिको बैठक बस्नेछ ।
प्रकाशित : फाल्गुन ५, २०७८ २०:५६