काठमाडौं — हाइब्रिड ‘डीवाई २८’ जातको धानबाट पीडित किसानले ७ हजार ७ सय रोपनी क्षेत्रफलको क्षतिपूर्ति मागेका छन् । काठमाडौं, भक्तपुर र ललितपुरका पालिकामार्फत ‘डीवाई–२८’ जातको धानको बीउका कारण बाला नलागेका किसानलाई क्षतिपूर्ति उपलब्ध गराउन क्षतिको विवरण मागिएको थियो ।

पालिकामार्फत उपत्यकाका किसानले ७ हजार ७ सय रोपनी क्षेत्रफलको क्षतिपूर्ति मागेको बीउबिजन गुणस्तर अनुसन्धान केन्द्र प्रमुख एवं राष्ट्रिय बीउबिजन समितिका सदस्य सचिव बेनुप्रसाद प्रसाईंले पुष्टि गरे । ‘आकलन गरेभन्दा धेरै नै क्षतिको विवरण प्राप्त भएको छ, वास्तविक/प्रभावित किसान हुन्/होइनन् भन्नेबारे पालिकाहरूसँग छलफल गर्दै छौं,’ उनले भने ।

काठमाडौं, भक्तपुर र ललितपुरका विभिन्न स्थानमा ‘डीवाई–२८’ जातको धान बालीमा दाना नलागेको सन्दर्भमा किसानको गुनासो आएको थियो । यसपछि कात्तिक १५ मा बीउबिजन गुणस्तर नियन्त्रण केन्द्रमा केन्द्र प्रमुख बेनुप्रसाद प्रसाईंको अध्यक्षतामा नेपाल कृषि अनुसन्धान परिषद्, राष्ट्रिय बाली विज्ञान अनुसन्धान केन्द्र, कृषि ज्ञान केन्द्र, डीवाई–२८ जातको धान आयातकर्ता काष्ठमण्डप ट्रेड प्वाइन्टका प्रतिनिधिको उपस्थितिमा बसेको बैठकले किसानलाई क्षतिपूर्ति/राहत उपलब्ध गराउने निर्णय गरेको थियो । सोहीअनुसार बीउ बिक्रेता ‘काष्ठमण्डप ट्रेड प्वाइन्ट’ले किसानलाई प्रतिरोपनी २ हजार २ सय ५० रुपैयाँका दरले क्षतिपूर्ति दिने निर्णय भएको केन्द्रले जनाएको छ ।