एमाले नेता नेम्वाङले भने- 'काम टुंग्याए बराबर छ, भोलि बिहान ८ बजे सुखद् समाचार सुन्‍न पाउनुहुनेछ'- समाचार - कान्तिपुर समाचार

एमाले नेता नेम्वाङले भने- 'काम टुंग्याए बराबर छ, भोलि बिहान ८ बजे सुखद् समाचार सुन्‍न पाउनुहुनेछ'

कान्तिपुर संवाददाता

काठमाडौँ — नेकपा (एमाले) को विवाद समाधानका लागि गठित कार्यदल सदस्य सुवासचन्द्र नेम्वाङले आफूहरुले कामलाई करिब टुंगो लगाइसकेको दाबी गरेका छन् । 

सिंहदरबारमा शनिबार भएको कार्यदल बैठकपछि सञ्‍चारकर्मीसँग नेता नेम्वाङले काम टुंग्याए बराबर रहेको र आइतबार बिहान सुखद् समाचार सुनाइने बताए । उनले भने, 'काम टुंग्याए बराबर छ । भोलि बिहान ८ बजे सुखद् समाचार सुन्‍न पाउनुहुनेछ ।'

उनले पार्टीमा तीन वर्षदेखि विवाद कायम रहेकोले समाधानको उपाय खोज्न पनि समय लागेको प्रस्ट पारे । 'यो विवादले झन्डै तीन वर्ष भयो होला, कत्रो विवादमार्फत हामी यहाँ आइपुगेका छौं । तीन वर्षको विवाद, आज हामी कति दिन भयो र बसेको, त्यसकारणले गर्दा ढिला भएको हो,' उनले भने ।

नेता नेम्वाङले कार्यदल बैठक आइतबार बिहान ८ बजे सिंहदरबारमै पुन: बस्ने जानकारी पनि दिए ।

शनिबार अर्थ मन्त्रालयमा एक घण्टाभन्दा बढी समय बसेको कार्यदल बैठकले 'सहमति' लाई अन्तिम निष्कर्षमा पुर्‍याउन सकेन । शुक्रबार बसेको कार्यदल बैठकमा सहमति जुटेको र त्यसलाई शनिबार अन्तिम रुप दिने नेताहरुले दाबी गरेका थिए । बैठकपछि कार्यदल सदस्य गोकर्ण विष्टले पनि भोलि सार्थक निष्कर्षमा पुग्ने गरी बैठक सकिएको बताए । नेता विष्टले भने, 'भोलिको दिन एकताको निष्कर्ष सुन्ने दिन हुनेछ ।'

त्यस्तै नेता भीम रावलले छलफलको अन्तिम विन्दुमा रहेको बताउँदै छिट्टै निष्कर्षमा दिने दाबी गरे । 'हामीले विभिन्न विषयमा छलफल गरेका छौं । छलफलको अन्तिम विन्दुमा छौं । सम्भवतः छलफललाई छिट्टै पूरा गरेर निष्कर्षमा पुग्नेछौं ।'

कार्यदलका अर्का सदस्य घनश्याम भूसालले भने केही प्रतिक्रिया नदिई बाहिरिएका थिए । कार्यदलमा अध्यक्ष केपी शर्मा ओली पक्षबाट सुवास नेम्वाङको नेतृत्वमा विष्णु पौडेल, प्रदीप ज्ञवाली, शंकर पोखरेल र विष्णु रिमाल छन् भने नेता नेपालको पक्षबाट भीम रावलको नेतृत्वमा घनश्याम भुसाल, सुरेन्द्र पाण्डे, गोकर्ण विष्ट र रघुजी पन्त रहेका छन् ।

प्रकाशित : असार २६, २०७८ १९:२०
प्रतिक्रिया
पठाउनुहोस्

बुद्ध प्रतिमाको अनावरण

कान्तिपुर संवाददाता

कपिलवस्तु — कनकमुनि र क्रकुछन्द बुद्ध प्रतिमाको निग्लिहवा र गोटिहवामा अनावरण गरिएको छ । प्रदेश सरकारका चार क्याबिनेट मन्त्रीसहित पुगेका लुम्बिनी प्रदेशका मुख्यमन्त्री शंकर पोखरेलले शनिबार बुद्ध प्रतिमाको अनावरण गरेका हुन् । पर्यटकीय आकर्षण थप्न प्रदेश सरकारले उनीहरूकै जन्मस्थलमा बगैंचा–पार्कसहित पूर्ण कदका बुद्ध प्रतिमा स्थापना गरेको हो ।

कपिलवस्तु नगरपालिका–११, अरौराकोटमा कनकमुनि बुद्ध र कपिलवस्तु नगरपालिका–५, गोटिहवामा क्रकुछन्द बुद्धका साढे ६ फिट अग्ला र ३० इन्च चौडाइका प्रतिमा स्थापना गरिएका छन् । रूपन्देहीको तिलोत्तमा नगरपालिका–७, करैयाका मूर्तिकार गोविन्द चौधरीले सात महिना लगाएर बनाएका पित्तलका एक मूर्तिको तौल एक क्विन्टल रहेको छ ।

थेरवादी सम्प्रदायका भिक्षु र महायानी सम्प्रदायका लामाले मंगल पाठ गरेपछि मुख्यमन्त्री पोखरेलले द्वीप प्रज्ज्वलन गरी बौद्ध परम्परा अनुसार प्रतिमा अनावरण गरेका थिए । ‘शाक्यमुनि बुद्धभन्दा अघिका बुद्धका बारेमा धेरैलाई थाहा थिएन,’ प्रदेश शिक्षामन्त्री धर्मबहादुरलाल श्रीवास्तवले भने, ‘यहाँ बनेको प्रतिमा र पार्कले उनीहरूका बारेमा जान्ने र सोधखोज गर्न आउने बढ्ने अनुमान गरेका छौं ।’

ओझेलमा परेको प्राचीन नगरको महत्वलाई उजागर गर्ने भिक्षु महासंघका अध्यक्ष भिक्षु मैत्री महास्थवीरले बताए । ‘यसले शान्ति पर्यटनमा टेवा पुर्‍याउनेछ,’ उनले भने । भद्र कल्पमा जन्मेका कनकमुनि र क्रकुच्छन्द बुद्ध पाँचौं र छैटौं बुद्ध हुन् । शाक्यमुनि सातौं बुद्ध मानिन्छन् ।

प्रकाशित : असार २६, २०७८ १८:४१
पूरा पढ्नुहोस्
प्रतिक्रिया
पठाउनुहोस्
×