रोजगारदाता कम्पनी र श्रमिकलाई १९ करोड राहत- समाचार - कान्तिपुर समाचार
कान्तिपुर वेबसाईट
AdvertisementAdvertisement

रोजगारदाता कम्पनी र श्रमिकलाई १९ करोड राहत

बलराम बानियाँ

काठमाडौँ — सरकारले सामाजिक सुरक्षा कोषमा आबद्ध रोजगारदाता कम्पनी र तिनमा कार्यरत श्रमिक तथा कर्मचारीलाई करिब १९ करोड रुपैयाँ राहत प्रदान गरेको छ । सरकारले रोजगारदाता कम्पनी र श्रमिकका तर्फबाट कोषमा चैतमा जम्मा गर्नुपर्ने योगदान रकम तिरिदिएर राहत प्रदान गरेको हो ।

श्रम, रोजगार तथा सामाजिक सुरक्षा मन्त्रालय मातहतको सामाजिक सुरक्षा कोषका कार्यकारी निर्देशक कपिल ज्ञवालीका अनुसार ८ सय ६१ रोजगारदाता कम्पनी र तिनमा कार्यरत ३३ हजार ४ सय श्रमिक तथा कर्मचारीले कोषमा जम्मा गर्नुपर्ने १८ करोड ६६ लाख रुपैयाँ सरकारले तिरिदिएको छ । रोजगारदाता कम्पनीले सरकारबाट १२ करोड र श्रमिक तथा कर्मचारीले करिब ६ करोड ६६ लाख राहत पाएका छन् ।

कोषमा श्रमिक तथा कर्मचारीको न्यूनतम मासिक तलबबाट ११ प्रतिशत, निजी तथा गैरसरकारी क्षेत्रका रोजगारदाताका तर्फबाट २० प्रतिशत गरी ३१ प्रतिशत रकम हरेक महिना जम्मा गर्नुपर्ने कानुनी व्यवस्था छ । रोजगारदाताले आफ्ना श्रमिकहरूलाई न्यूनतम पारिश्रमिकको २० प्रतिशत रकम उपदान तथा सञ्चय कोषबापत कोषमा जम्मा गर्नुपर्छ । सरकारको राहतसँगै कोषमा आबद्ध श्रमिक तथा कर्मचारीले चैतको तलबसमेत पाएका छन् । लकडाउनका क्रममा व्यवसाय ठप्प रहेका रोजगारदाता कम्पनीले आफ्ना श्रमिक तथा कर्मचारीलाई चैतको तलब दिएको लिखित जानकारी प्राप्त भएपछि मात्र सरकारले राहत रकम कोषमा जम्मा गरिदिने गरेको छ । ‘३३ हजार ४ सय श्रमिक तथा कर्मचारी र तिनका रोजगारदाताले कोषमा जम्मा गर्नुपर्ने योगदान रकम सरकारले घोषित राहत कार्ययोजनाअनुसार तिरिदिएको हो,’ ज्ञवालीले भने ।

कोभिड–१९ को विश्वव्यापी महामारीको संकट लम्बिए सरकारले कोषमा आबद्ध रोजगारदाता कम्पनी र श्रमिक तथा कर्मचारीलाई यस्तो राहत प्रदान गर्दै जाने श्रम, रोजगार तथा सामाजिक सुरक्षा मन्त्रालयका अधिकारीले बताए ।

योगदानमा आधारित सामाजिक सुरक्षा कोषमा आबद्ध हुने श्रमिक तथा कर्मचारी र आश्रित परिवारले उपचार खर्च, दुर्घटना बिमा, अवकाशपछि पेन्सन र कार्यरत अवस्थामै मृत्यु भए परिवारले पेन्सन या उपदान सुविधा पाउने कानुनी व्यवस्था छ ।

ज्ञवालीले कोभिड–१९ को संक्रमण फैलिन नदिन सरकारद्वारा घोषित लकडाउनका कारण आर्थिक संकटमा परेका र कोषमा आबद्ध रोजगारदाता कम्पनी र तिनमा कार्यरत श्रमिक तथा कर्मचारीलाई राहत प्रदान गरिएको जानकारी दिए ।

आर्थिक संकटमा परेका बेला सरकारले राहत प्रदान गरेकाले कोषमा आबद्ध हुन रोजगारदाता कम्पनी र श्रमिक तथा कर्मचारी दुवैमा आकर्षण बढेको उनले बताए । उनका अनुसार सरकारले राहत कार्ययोजना घोषणा गरेसँगै कोषमा अन्नपूर्ण, याक एन्ड यति, हायात रिजेन्सी, र्‍याडिसनजस्ता पाँचतारे होटलसहितका विभिन्न रोजगारदाता कम्पनी र तिनमा कार्यरत श्रमिक तथा कर्मचारी आबद्ध भएका छन् । यसबीचमा कोषमा थप ३८ सय जना श्रमिक तथा कर्मचारी आबद्ध भएका हुन् ।

ज्ञवालीले यो राहतले कोभिड–१९ को महामारी लम्बिए या कुनै पनि क्षेत्र संकटमा परेका बेला सरकारले कोषमा आबद्ध रोजगारदाता कम्पनी र तिनमा कार्यरत श्रमिक तथा कर्मचारीका लागि सहयोग गर्छ भन्ने सकारात्मक सन्देश दिएको बताए । उनले सामाजिक सुरक्षाको दायरा बढाउन थप संगठित क्षेत्रका अतिरिक्त स्वरोजगार र असंगठित क्षेत्रमा कार्यरत व्यक्तिहरूलाई समेत क्रमश: कोषमा आबद्ध गर्ने प्रयास भइरहेको जानकारीसमेत दिए ।

प्रकाशित : वैशाख ५, २०७७ ०९:२८
प्रतिक्रिया
पठाउनुहोस्

कोरोनाबारे सचेतना जगाउँदै ८२ वर्षीय वडाध्यक्ष

अनिश तिवारी

सिन्धुपाल्चोक — सुकिलो दौरा सुरुवालमा थाकेकोजस्तो देखिने बुढ्यौली शरीर, शिरमा ढाका टोपी, पाउमा थोत्रो तुने चप्पल । मास्क, साबुन र सेनिटाइजरलगायतका सामग्री बाँड्दै स्वास्थ्य परिक्षणको लागि डाक्टरसहित स्वास्थ्यकर्मीसँगै गाउँको टोलैपिच्छै पुगिरहेका ८२ वर्षे उनी तरुनोझैं हरेक घर पुगेर स्थानीयलाई सम्झाउँछन्, कोरोनाबारे सूचना र परामर्श दिन्छन् ।

वडाअध्यक्ष खड्का मास्क, साबुनलगायत सामग्री स्थानीयलाई हस्तान्तरण गर्दै ।

जिल्लाकै ज्येष्ठ वडा अध्यक्ष त्रिपुरासुन्दरी गाउँपालिका- १, घोर्थलीका कर्णबहादुर खड्का यस्तै काममा व्यस्त छन् । ‘स्थानीय एकदमै डराएका छन्, जनप्रतिनिधिले भूमिका देखाउने समय भनेको आहिले हो, जनताले विश्वास गर्ने हामीलाई नै हो । हामीले नगरे कस्ले गर्छ र ?,’ खड्काले भने । कोरोना भाइरस संक्रमण (कोभिड- १९) लाई लिएर आत्तिएका स्थानीयलाई सर्तकता अपनाउन हरसम्भव प्रयास गरिएको उनले बताए ।

साबुन पानीले हात धुने, निश्चित दुरी राखेर भेट्ने र मास्क लगाएर बोल्ने, हात नमिलाउने, अपरिचितसँग नभेट्नेजस्ता सचेतनाका उपाय बताउँदै खड्का आफै हिँडिरहेका छन् । उनले विश्वभर महामारीको रूपमा फैलिएको कोरोना भाइरसको संक्रमण रोकथामका लागि ‘कोरोना रोकथामको लागि घर–टोलमा वडाध्यक्ष’ पनि संचालन गरेका छन् ।

‘परामर्श दिनुनका साथै मास्क, साबुनलगायत सामग्री बाँडिरहेका छौं, भविष्यमा हुनसक्ने कोरोना संक्रमण रोकथामको लागि कुदिरहेका छौ,’ उनले भने ।

झण्डै १५ हजार जनसंख्या भएको त्रिपुरासुन्दरी गाउँपालिकामा चोकटी, धुस्कुन, तौथली, पिस्कर र टेकानपुरसहित वडा १ मा साबिक घोथर्लीको ५ र ९ वडा समावेश छन् । तीभन्दा फरक र विकट देखिने भौगोलिक अवस्था बोकेको घोर्थलीभर ५ सय घरपरिवार बस्छन् । ती सबै परिवारको अवस्थाको विवरण लिइएको उनले बताए । उनीहरूलाई आवश्यक पर्ने स्वास्थ्य पूर्वाधार र हुनसक्ने खाद्य संकटबाट पार पाउनका लागि योजना बनाइरहेको पनि उनले जानकारी दिए ।

त्रिपुरासुन्दरीका गाउँलेले खाद्य, नुनतेलजस्ता दैनिक सामग्री ल्याउने मुख्य बजार चीनसँगको सीमावर्ती क्षेत्र तातोपानी नाकासँग जोडिएको २६ किलोमिटर दूरीमा रहेको बाह्रबिसे हो । उक्त बजार पुग्न दिनभर हिँड्नुपर्छ । ‘त्यहाँबाट आउने कुनै खाद्य सामग्रीको लागि रोक लगाएका छैनौं, स्थानीयलाई सहकार्य गरिदिन सुरक्षाकर्मीसँग छलफल गरिसकेका छौ,’ वडाअध्यक्ष खड्काले भने । कोरोना सचेतना अभियानमा लागेका उनले आइसोलेसन र क्वारेन्टाइनको पूर्वाधार निर्माण गर्नका लागि गाउँपालिकासँग छलफल भएको बताए । वडामै क्वारेन्टाइन निर्माण गरिएको छ । विदेशबाट फर्किएकालाई स्वास्थ्य परीक्षण गरेर होम क्वारेन्टाइनमा बस्न भनिएको छ ।

त्रिपुरासुन्दरी गाउँपालिका- ३ मा १५ बेडको क्वारेन्टाइन निर्माण गरिएको छ । गाउँपालिकाका जनप्रतिनिधि कोरोनाविरुद्ध जनचेतना फैलाउन लागिरहेका छन् । ८२ वर्षको उमेरमा पनि कोरोना संक्रमण रोकथाम गर्न सचेतनामा जुटेका खड्का उदाहरणीय बनेको त्रिपुरासुन्दरी गाउँपालिकाका अगुवा भक्तध्वज बोहोराले बताए । ‘गाउँपालिका अध्यक्ष र अन्य जनप्रतिनिधिले पनि वडाअध्यक्ष खड्काको जस्तै सक्रियता देखाउनुपर्ने हो, तर हुन सकेन । वडाअध्यक्ष खड्काको सक्रियता प्रशंसनीय छ,’ उनले भने ।

प्रकाशित : वैशाख ५, २०७७ ०९:१९
पूरा पढ्नुहोस्
प्रतिक्रिया
पठाउनुहोस्
×