१२.१२°C काठमाडौं
काठमाडौंमा वायुको गुणस्तर: १६३

खेत र गाउँ बचाउन चाहन्थे दिलीप

अवैध उत्खनन‌्‌काे विराेध गर्दा टिपरले किचेर हत्या
सन्तोष सिंह

धनुषा — भारतको भोपालमा इन्जिनियरिङ पढ्दै गरेका मिथिला नगरपालिका–५ श्रीपुरका २४ वर्षीय ओमप्रकाश महतो (दिलीप)को शुक्रबार बिहान टिपरले किचेर हत्या गरियो । महतो दुई साताअघि मात्र कलेज बिदामा घर फर्केका थिए । महतो बिटेक इन्जिनियरिङको अन्तिम सेमेस्टर पढ्दै थिए ।

खेत र गाउँ बचाउन चाहन्थे दिलीप

गाउँमा मिलनसार र लोकप्रिय युवा दिलीप राजनीतिमा रुचि राख्थे । छिमेकी संजयकुमार महतोका अनुसार दिलीप गाउँमा हुने विवादहरु मिलाउन पनि अग्रसर हुन्थे । दिलीपका साथी एवं स्थानीय विद्यालयका शिक्षक कमलेश सिंहकाअनुसार दिलीपले पछिल्लो २ वर्षयता गाउँनजिकैको औरही खोलामा भइरहेको उत्खननकाे विरोध गरिरहेका थिए ।

नदीमा गरिने उत्खननले श्रीपुर वरपरका उब्जाउ खेत खोलाले कटान गर्ने र गाउँमा बाढी छिर्ने भन्दै दिलीप निरन्तर यसको विरोधमा थिए । उत्खननकाे विरोध गरेकै कारण उनको पटक–पटक ठेकेदारहरुसँग विवाद भएको इलाका प्रहरी कार्यालय ढल्केबरका प्रहरी निरीक्षक रामकुमार यादव बताउँछन् ।

उनलाई धम्की आउनु सामान्यजस्तै भएको आफन्त बताउँछन् । चिनजानकै व्यक्तिले धम्की दिँदा उनी वास्ता गर्दैनथे । दिलीपका दाई वीरेन्द्रकुमार महतो नदी उत्खननकाे विरोध गरेकै कारण उनको हत्या भएको बताउँछन् । ‘उसलाई धम्की र प्रलोभन आइरहेका थिए,’ उनले भने, ‘ठेक्दारहरुले घरमै आएर धम्की र प्रलोभन दिन्थे । क्रसर सञ्चालकले मोटर साइकल खरिद गरिदेने प्रलोभन दिए । तर, ऊ न धम्कीबाट डरायो न प्रलोभनमा पर्‍यो । विरोध गर्न छोडेन ।’

दिलीपले गत वर्ष खोलामा भएको उत्खननबारे जनकपुरका पत्रकारलाई बोलाएरसमेत देखाएका थिए । सञ्चारमाध्यममा उत्खन्नको खबर आएपछि केही दिन कारोबारी काम बन्द पनि भयो । सञ्चारकर्मीको समेत साथ पाएका महतोलाई क्रसर व्यवसायी र निर्माण व्यवसायी संयुक्त रुपमा मिलाउन चाहन्थे ।

केही महिनाअघि छठ मनाउन घर आउँदा पनि दिलीपको क्रसर व्यवसायीहरुसँग विवाद भएको थियो । दुई साताअघि घर आएका उनी औरही खोलामा राति डोजर प्रयोग गरी भइरहेको उत्खनन रोक्ने अभियान चलाउन चाहन्थे । तर, उनलाई सहयोग गर्ने कोही थिएन ।

दिलीपले खोलामै पुगेर उत्खनन नगर्न आग्रह गरेपछि उनका बुबा रामजीवन महतोलाई क्रसर सञ्चालक विपन महतोले टिपरले किचेर ज्यान मार्ने धम्की दिएको दाजु वीरेन्द्रले बताए ।

शुक्रबार बिहान घर पछाडिको खोलामा लोडर र टिपर गुडेको अवाज सुनेपछि साथी रोशन यादवसँग खोलातर्फ गएका थिए । त्यहीँ उनलाई टिपरले किचेर हत्या गरिएको साथी रोशनले गाउँमा आएर जानकारी गराएका थिए । दिलीपको किचेर हत्या गरेको ना ७ ख ६४१३ टिपर र चालक महोत्तरी बर्दिबास–९ का ३४ वर्षीय मुनिन्द्र महतोलाई प्रहरीले नियन्त्रणमा लिएको छ । नियन्त्रण गरिएको टिपर घटनास्थलबाट २ सय मिटर दुरीमा रहेको चुरियामाई बालुवा प्रशोधन उद्योगको रहेको प्रहरीले जनाएको छ ।

महतोको हत्यापछि विपन महतोसहितका बालुवा प्रशोधनका सञ्चालकहरु फरार छन् । दिलीपको शव पोष्टमार्टमका लागि जनकपुर प्रादेशिक अस्पतालमा राखिएको छ ।

सम्बन्धित समाचार :

अवैध उत्खनन्‌को विरोध गर्ने युवकको टिपरले किचेर हत्या

प्रकाशित : पुस २५, २०७६ १६:००
प्रतिक्रिया
पठाउनुहोस्
जनताको राय

नेपालको पासपोर्ट फेरि पनि विश्व वरीयतामा १०३ औं स्थानमा परेर खराब सूचिमै दर्ज भयो । स्तर उकास्न मुख्य रुपमा के गर्नुपर्छ ?