भक्तपुरमा नगरपालिकाभित्र भदौ मसान्तसम्म सार्वजनिक यातायात बन्द- उपत्यका - कान्तिपुर समाचार

भक्तपुरमा नगरपालिकाभित्र भदौ मसान्तसम्म सार्वजनिक यातायात बन्द

कान्तिपुर संवाददाता

भक्तपुर — भक्तपुर नगरपालिकाले नगरक्षेत्रभित्र भदौ मसान्तसम्म सार्वजनिक यातायात सञ्चालनमा रोक लगाएको छ । निषेधाज्ञा खुकुलो बनाएर उपत्यकाको तीन वटै जिल्ला प्रशासन कार्यालयले सार्वजनिक यातायात जोर–बिजोर प्रणाली लागू गरी सञ्चालन गर्न अनुमति दिए पनि नगरले यस्तो निर्णय गरेको हो ।

नगरभित्रबाट काठमाडौं उपत्यकाका विभिन्न स्थानमा सञ्चालनमा रहेका रुट नम्बर १, ७ र ९ मा चल्ने छोटो दूरीका यातायातहरू भदौ ३१ गते सम्मका लागि बन्द गर्ने निर्णय भएको नगरप्रमुख सुनिल प्रजापतिले बताए ।

नगरपालिकाले यातायात व्यवसायीसँगको छलफलबाट भदौ मसान्तसम्म सार्वजनिक यातायात बन्द गर्ने निर्णय भएको उनले बताए ।

त्यसैगरी, नगरप्रमुख प्रजापतिको अध्यक्षतामा भक्तपुर उद्योग वाणिज्य संघ र भक्तपुर घरेलु तथा साना उद्योग संघका प्रतिनिधिहरूसँग बसेको बैठकले सुरक्षाका उपाय अपनाएर व्यवसाय सञ्चालन गर्न आग्रह गरेको छ । व्यवसायीहरुले मास्क, पञ्जा लगाई शारीरिक दूरी कायम गर्दै स्वास्थ्य सुरक्षा नीति अपनाएर मात्रै व्यापार व्यवसाय गर्न आग्रह गरेको उनले बताए ।

प्रकाशित : भाद्र २६, २०७७ ११:०७
प्रतिक्रिया
पठाउनुहोस्

काठमाडौंका ६३ वर्षीय पुरुषको कोरोना संक्रमणबाट मृत्यु

उपत्यकामा कोरोनाबाट मृत्यु हुनेको संख्या ६३ पुग्यो
कान्तिपुर संवाददाता

ललितपुर — कोरोना भाइरसको संक्रमणबाट काठमाडौंमा थप एक जनाको मृत्यु भएको छ । शुक्रबार बिहान काठमाडौंका ६३ वर्षीय संक्रमितको उपचारका क्रममा पाटन अस्पतालमा मृत्यु भएको हो । 

जिल्ला स्वास्थ्य कार्यालय ललितपुरका अनुसार भदौ २४ गतेदेखि पाटन अस्पतालमा उपचार गराइरहेका ती पुरुषको शुक्रबार बिहान ३ बजे उपचारका क्रममा मृत्यु भएको हो ।

योसँगै काठमाडौंमा कोरोनाबाट मृत्यु हुनेको संख्या ४६ पुगेको छ । त्यस्तै भक्तपुरमा १० र ललितपुरमा ७ जना गरी उपत्यकामा ६३ जनाको मृत्यु भएको छ ।

बढी जनघनत्व रहेको काठमाडौं उपत्यकामा मात्रै संक्रमित १० हजार नाघेका छन् । संक्रमितमध्ये करिब ३५ प्रतिशत लक्षणसहितका छन् । स्वास्थ्य मन्त्रालयको तथ्यांकअनुसार काठमाडौं उपत्यकामा संक्रमितको संख्या १० हजार १४ पुगिसकेको छ ।

काठमाडौंमा ८ हजार १ सय ८, ललितपुरमा १ हजार ५३ र भक्तपुरमा ८ सय ५३ जना छन् । मन्त्रालयका अनुसार बिहीबारसम्म उपत्यकामा ५ हजार ५ सय ५७ जना उपचाररत छन् भने ४ हजार ३ सय ९५ जना डिस्चार्ज भइसकेका छन् । हाल उपत्यकामा समूहमा रहनेहरू बढी मात्रामा संक्रमित देखिएका छन् ।

प्रकाशित : भाद्र २६, २०७७ १०:४९
पूरा पढ्नुहोस्
प्रतिक्रिया
पठाउनुहोस्
×