'होम क्वारेन्टाइन स्वीकार्य छैन, क्वारेन्टाइनको व्यवस्था गर स्थानीय सरकार' भन्दै प्रदर्शन

तस्बिर : बिजु महर्जन

काठमाडौँ — बाहिरबाट आएका व्यक्तिका लागि क्वारेन्टाइन स्थापना गर्न भन्दै कीर्तिपुरका स्थानीयले प्रदर्शन गरेका छन् । सरकारले होम क्वारेन्टाइन बस्नुपर्ने भनेपछि स्थानीयहरू विरोध प्रदर्शनमा उत्रिएका हुन् । 

कीर्तिपुरका स्थानीयले पाँगा दोबाटोमा होम क्वारेन्टाइन स्वीकार्य नभएकाले स्थीय तहले क्वारेन्टाइन निर्माण गर्नुपर्ने माग गरेका हुन् ।

गृह मन्त्रालयले होम क्वारेन्टाइन बस्न दिने भन्ने निर्णय गरेको भन्दै उनीहरूले प्रदर्शन गरेका हुन् ।

प्रदर्शनका क्रममा उनीहरूले दूरी कायम गरेर विभिन्न नारा लेखिएका प्लेकार्ड देखाएका थिए ।

'नागरिक खबरदारी प्रदर्शन' कार्यक्रम रहेको सहभागीले बताएका थिए ।

प्रकाशित : असार १३, २०७७ १७:४९
प्रतिक्रिया
पठाउनुहोस्

नेकपा स्थायी कमिटी बैठक १६ गतेसम्म स्थगित, तेस्रो दिन पनि सीमा विवादमा छलफल

बबिता शर्मा

काठमाडौँ — सत्तारुढ नेकपाको जारी स्थायी कमिटी बैठक १६ गतेसम्मका लागि स्थगित भएको छ । आइतबार मदन भण्डारी जयन्ती भएको हुँदा नेताहरू विभिन्न कार्यक्रममा सहभागी हुनुपर्ने र सोमबार असार १५ भएकोले बैठक १६ गते बालुवाटारमै बस्ने जानकारी प्रवक्ता नारायणकाजी श्रेष्ठले दिए ।

बुधबारबाट सुरु भएको बैठकको तेस्रो दिन पनि भारतसँगको सीमा विवादमै केन्द्रित भएर छलफल भएको थियो । बैठकमा २१ स्थायी कमिटी सदस्यले धारणा राखेको प्रवक्ता श्रेष्ठले बताए । देवेन्द पौडेल, सुरेन्द्र पाण्डे, सुवास नेम्वाङ्, जनादर्न शर्मा, गिरिराजमणी पोखरेल, रघुजी पन्त, टोपबहादुर रायमाझी, सत्यनारायण मण्डल, युवराज ज्ञवाली, नन्द कुमार प्रसाई, लेखराज भट्ट, प्रदीप ज्ञवाली, मणि थापा, शक्ति बस्नेत, बामदेव गौतम, घनश्याम भुसाल, योगेश भट्टराई, पृथ्वीसुब्बा गुरुङ्, ईश्वर पोखरेल, विष्णु पुकार श्रेष्ठ र पुष्प कँडेलले बोलेका थिए ।

बोल्ने सबै नेताहरुले नेपालको सम्पूर्ण भूभाग समेटिएको नक्सा प्रकाशित गर्ने र त्यसलाई संविधानको अनुसूचिमा समेत समावेश गर्ने काम गरेर ऐतिहासिक पहल गरिएको भन्दै सरकारको प्रशंसा गरेको प्रवक्ता श्रेष्ठले जानकारी दिए । उनका अनुसार अब राष्ट्रिय एकता कायम गरेर नै भारतले अतिक्रमण गरेको नेपाली भूमि फिर्ता ल्याउन सरकारले गम्भिर कदम चाल्नुपर्नेमा सबै नेताहरुले जोड दिएका थिए ।

शुक्रबारको बैठकमा परराष्ट्रमन्त्री एवं स्थायी कमिटी सदस्य प्रदीप ज्ञवालीले सीमा समस्या समाधानका लागि सरकारले गरिरहेको पहलबारे ब्रिफिङ गरेका थिए । नेपालले भारतसँग बारम्बार वार्ताका लागि प्रस्ताव गर्दा पनि भारत वार्ताका लागि सकारात्मक नदेखिएको मन्त्री ज्ञवालीले ब्रिफिङ गरेका थिए ।

तेस्रो दिन पनि प्रधानमन्त्री एवं नेकपा अध्यक्ष केपी शर्मा ओली बैठकको सुरुमा उपस्थित भएर केहीबेरमै निस्किएका थिए । त्यसपछि अर्का अध्यक्ष पुष्पकमल दाहालले स्वास्थ्य समस्याका कारण प्रधानमन्त्री बैठकमा बस्न नसको जानकारी दिएका थिए ।

शुक्रबार प्रधानमन्त्री ओली बैठकमा उपस्थित भएका थिएनन् । बैठकलाई छल्न खोजेको भन्दै नेताहरुले प्रधानमन्त्रीको आलोचना गरेका थिए ।

प्रकाशित : असार १३, २०७७ १७:३०
पूरा पढ्नुहोस्
प्रतिक्रिया
पठाउनुहोस्
×