विराटनगर — कोरोना महामारीका बेला प्रदेश १ मा ज्वरोको औषधि सिटामोल अभाव भएको छ । विराटनगरलगायत प्रदेशभर एक सातादेखि सिटामोल अभाव भएको नेपाल औषधि व्यवसायी संघ प्रदेश १ ले जनाएको हो । 

समिति उपाध्यक्ष रहेका विराटनगरको एपोलो फार्मेसीका सञ्चालक धनराज काफ्लेले मागका तुलनामा आपूर्ति नबढ्दा अभाव भएको बताए । अहिले दैनिक १० देखि १५ जना उपभोक्ता सिटामोल नपाएर फार्मेसीबाट फर्किने गरेको उनको भनाइ छ । कोरोना संक्रमण दर बढेसँगै सिटामोलको माग बढेको हो । ‘दुई साता अगाडिदेखि सिटामोल खोज्न आउनेको संख्या ह्वात्तै बढेको छ,’ उनले भने, ‘होलसेलमा १०/१२ दिनदेखि माग गर्दै आएका छौं, आपूर्ति नै छैन । त्यसैले नपाइएको हो ।’

नेपाल औषधि व्यवसायी संघ मोरङका अध्यक्ष तथा ओम विराट औषधि पसलका सञ्चालक लक्ष्मी तिम्सिनाले अधिकांश औषधि पसलमा एक पत्ता पनि सिटामोल बाँकी नभएको दाबी गरे । ‘डिमान्ड थेग्‍नै नसक्ने छ तर साता–दस दिनदेखि सिटामोल आएकै छैन, उपभोक्तालाई कहाँबाट दिनु ?,’ उनले भने, ‘होलसेल पसलमै सिटामोल नभएको अवस्थामा खुद्रा विक्रेताले कहाँबाट उपभोक्तालाई उपलब्ध गराउन सक्छ ।’ 

निषेधाज्ञा लागेपछि एकै दिनमा ५० देखि सय पत्तासम्म सिटामोल बेचेको उनले बताए । ‘एकै जनाले १०/१५ पत्तासम्म खरिद गरेकाले पनि बजारमा अभावको अवस्था आएको हो,’ उनले भने । घाँटीको समस्या भएर खोकी लाग्दा खाने ‘एजिथ्रो माइसिन’, दमको रोगीलाई आवश्यक हुने आस्थालिन औषधिलगायतका दीर्घ रोगको औषधि पनि अभाव भएको तिम्सिनाले बताए । 

बजारमा सिटामोल अभाव भएको जनगुनासो बढेपछि औषधि व्यवस्था विभागको कार्यालय विराटनगरले दुई वटा समूह बनाएर सुनसरी, मोरङ, झापा र इलामका खुद्रा तथा थोक औषधि विक्रेता पसलमा अनुगमन गरेको छ । अनुगमनका क्रममा थोक विक्रेताहरूमा नै सिटामोल अभाव रहेकाले बजारमा अभाव हुनु स्वाभाविक भएको विभागको विराटनगर कार्यालय प्रमुख सञ्जीव शर्मा कट्टेलले बताए । अनुगमनका क्रममा सिटामोलको चरम अभाव, डक्सिसाइक्लिन, एजिथ्रोमाइसिन, भिटामिन सी, स्टेरोइड, जिंक चक्की, मिथाइल टेडमिसोलन र डिग्जामिथासोन पनि अभाव रहेको पाइएको जानकारी उनले दिए ।