वैदेशिक रोजगार विभागले मंगलबार सूचना जारी गर्दै हाल कायम रहेको ७०० रूपैयाँमै अभिमुखीकरण तालिम सञ्चालन गर्नुपर्ने जनाएको हो ।
काठमाडौं — वैदेशिक रोजगार विभागले वैदेशिक रोजगारीमा जाने श्रमिकहरूका लागि सञ्चालन हुने अभिमुखीकरण (ओरिएन्टेसन) तालिमको शुल्क नबढेको स्पष्ट पारेको छ । विभागले मंगलबार सूचना जारी गर्दै हाल कायम रहेको ७०० रूपैयाँ शुल्कमै तालिम सञ्चालन गर्नुपर्ने जनाएको हो ।
विभागका अनुसार अभिमुखीकरण तालिम सञ्चालन कार्यविधि, २०७६ बमोजिम प्रतिप्रशिक्षार्थी अधिकतम ७०० नै शुल्क तोकिएको छ। केही स्थानमा शुल्कवृद्धि गरिएको भन्ने हल्ला फैलिए पनि त्यसमा कुनै सत्यता नरहेको विभागको भनाइ छ ।
सूचनामा २ दिनसम्म सञ्चालन हुने उक्त तालिमका लागि तोकिएको शुल्कभन्दा बढी लिन नपाइने उल्लेख छ । वैदेशिक रोजगारसम्बन्धी ऐन, नियम तथा कार्यविधिअनुसार सबै तालिम प्रदायक संस्थाहरूले निर्धारित शुल्कमै सेवा दिनुपर्ने विभागले जनाएको छ ।
कुनै संस्थाले तोकिएको भन्दा बढी शुल्क असुलेको पाइएमा कारबाही गरिने चेतावनी दिँदै विभागले त्यस्ता संस्थाको इजाजतपत्रसमेत खारेज गर्न सकिने जनाएको छ ।
विभागले श्रमिकहरूलाई शुल्कसम्बन्धी अनियमितता भएमा सम्बन्धित निकायमा उजुरी दिन पनि आग्रह गरेको छ ।
