काठमाडौँ — श्रम, रोजगार तथा सामाजिक सुरक्षा मन्त्रालयले मान्यता प्राप्त स्वास्थ्य संस्थाले वैदेशिक रोजगारीमा जाने श्रमिकको स्वास्थ्य परीक्षण गर्न सूचीकरण खुला गर्ने निर्णय गरेको छ ।

१७ चैतमा श्रम, रोजगार तथा सामाजीक सुरक्षामन्त्री दीपककुमार साहले यस विषयमा निर्णय गर्दै वैदेशिक रोजगारमा जाने श्रमिकको स्वास्थ्य परीक्षण गर्न सरकारबाट स्वीकृति प्राप्त वा सरकारको स्वामित्वमा रहेको स्वास्थ्य संस्थाको लागि सूचीकरण हुन पाउने निर्णय गरेको हो ।

मन्त्रालयले सूचीकरणको लागि आवश्यक प्रक्रिया अगाडि बढाएको जनाएको छ । हाल २५० वटा स्वास्थ्य संस्था र सरकारी अस्पतालबाट पनि श्रमिकको स्वास्थ्य परीक्षण भइरहेको छ । मन्त्रालयले यसमा संख्या बढाउन लागेको हो ।

सूचीकरण भएका स्वास्थ्य संस्थाबाट गरिएको परीक्षणमा उत्तिर्ण भएका श्रमिक मात्रै वैदेशिक रोजगारीमा जान योग्य हुन्छन् ।