राजविराज — उपकुलपति र रजिस्ट्रारकै कारण मधेश कृषि विश्वविद्यालयमा अस्तव्यस्तता छाएको मधेश प्रदेशका मुख्यमन्त्री तथा कुलपति सतिशकुमार सिंहले बताएका छन् । ठेकेदारहरू काम गरेको पैसा माग्न जाँदा ‘पहिला कमिसन देऊ अनि पैसा दिन्छु’ भनेर भीसी र रजिस्ट्रारले फर्काएको पनि उनको आरोप छ ।

विश्वविद्यालयका यिनै बेथितिबारे मुख्यमन्त्री तथा कुलपति सिंहसँग कान्तिपुरका लागि अवधेशकुमार झाले गरेको कुराकानी :

मधेश कृषि विश्वविद्यालय किन अस्तव्यस्त हुँदै गएको हो ?

कुनै अस्तव्यस्त छैन । उपकुलपति र रजिस्ट्रारले आफ्नो मनपरी हिसाबले काम गरिरहेका मात्र हुन् । 

उपकुलपति र रजिस्ट्रारले के मनपरी गरे ?

त्यहाँ कर्मचारी भर्नादेखि लिएर कर्मचारीलाई पूर्णता दिन भन्दा मानेनन् । कर्मचारी नभएको स्थानमा पाँच सदस्यीय समिति बनाएर खर्च गर्ने मापदण्ड बनेको छ । तर, त्यहाँ उहाँहरू (उपकुलपति र रजिस्टार)ले तीन सदस्यीय समिति मात्र बनाउनु भएको छ, त्यसमा पनि दुई जनाले मात्र मिलेर मनपरी हिसाबले खर्च गर्नुभएको छ । बजारमा कुनै प्रतिस्पर्धा गरिएको छैन । खालि आफ्नो मनको हिसाबले कोटेसन गर्ने, खरिद नियमावली मिचेर काम गर्ने काम भएको छ ।

भुक्तानी नहुँदा विश्वविद्यालयको भवन निर्माण कार्य रोकिने अवस्था आयो नि ?