नयाँ दिल्ली — आज सत्ता र राजीनामाको केन्द्रमा रहेका  धर्मेन्द्र प्रधानले नै करिब तीन दशकअगाडि भुवनेश्वरमा प्रश्नपत्र लीकविरुद्धको विद्यार्थी आन्दोलनको नेतृत्व गरेका थिए ।

यो सन् १९९६ ताकाको कुरा हो, जब धर्मेन्द्र प्रधान अखिल भारतीय विद्यार्थी परिषद्का राष्ट्रिय सचिव थिए । त्यसबेला ओडिशामा कक्षा १२ को बोर्ड परीक्षाको प्रश्नपत्र चुहावट भएको विरोधमा २७ वर्षीय प्रधानको नेतृत्वमा करिब २,००० भन्दा बढी विद्यार्थीहरू सडकमा उत्रिएका थिए ।

तत्कालीन मुख्यमन्त्री जेबी पटनायकको सरकारविरुद्ध भएको उक्त प्रदर्शन हिंसात्मक बनेको थियो । त्यसक्रममा सरकारले खटाएको र्‍यापिड एक्सन फोर्ससँगको झडपमा प्रधान स्वयंम् गम्भीर घाइते भएका थिए । उनले लामो समय अस्पतालमा बिताए । 

त्यो सडक संघर्षले अन्ततः ओडिशा सरकारलाई परीक्षा समितिमा व्यापक सुधार गर्न बाध्य बनाएको थियो । विद्यार्थी राजनीतिबाट उदाएका  प्रधान आरएसएसको पृष्ठभूमिबाट आएका हुन् ।